L-R van tocar nel prestixosu festival indie BBK Live

L-R siguen abriendo nuevos caminos pa la música asturiana. El prestixosu festival de música indie, rock y urbana Bilbao BBK Live acaba d’anunciar el so cartelu completu y nél anúnciase l’actuación del dúu formáu por Leticia Baselgas y Rubén Bada. La formación post-folk va actuar el xueves 7 de xunetu en Kobetamendi nesti eventu que suel axuntar a más de 120.000 persones y qu’esti añu vuelve a cellebrase con un cartel enllenu de pernomaos artistes internacionales y estatales.

«Tamos flipando por nós, por llegar a estos espacios y porque tamos poniendo a la música y a la cultura asturiana en sitios a los que yo cuando taba faciendo folk nel añu 2000 yera impensable que llegáremos», desplica Rubén Bada a Musicasturiana.com. Pa esti veteranu músicu «lo más ablucante de too» ye qu’esto lo algamen siendo un grupu que fai «música asturiana pal baille calteniendo les estructures del baille tradicional, polo que nun podemos axustanos a lo que sería una canción pop o una canción comercial».

«Cantamos dafechu n’asturianu y ponemos unes cuotes d’autenticidá qu’escapen a estes movides más mainstream y de fechu nos comentaron que somos un grupu de nichu», diz Bada sorprendíu. Sicasí, el músicu reconoz que fechos como esti demuestren que «la música asturiana, la cultura asturiana y la llingua asturiana interesa fuera d’Asturies». «Ye la preba de que funciona, de que podemos salir cantando y falando na nuestra llingua y amosando tar arguyosos de la nuestra cultura», remata’l músicu.

Abriendo camín

L-R ye una de les propuestes más orixinales de la música asturiana nos últimos años. Formaos en 2016 polos renomaos músicos Rubén Bada y Leticia Baselgas, reellaboren la música del país calteniendo los ritmos tradicionales pal baille pero incluyendo soníos como’l blues, jazz o rock. Voz, pandereta y guitarra elléctrica dan forma a lo qu’ellos etiqueten como post-folk. En 2018 asoleyó’l so primer trabayu discográficu, al que lu acompañó la que probablemente fuera la xira más llarga d’un grupu folk nos últimos años. En 2021 llanzaron ‘N.O.S.’, un trabayu mui cuidáu y completu col qu’afonden nel so soníu.

Dientro de la so trayectoria, destaca qu’abrieron camín y nun llegaron namás a circuitos venceyaos a la música tradicional como’l Festival Intercélticu de Lorient o’l Poborina Folk, sinón que tamién tán aportando a públicos d’otres escenes independientes como demuestra’l so pasu pel Gijón Sound Festival o esta actuación nel BBK Live, que va suponer qu’un grupu que cante dafechu n’asturianu y beba de la música asturiana tradicional, actúe per primer vez nún de los festivales más importantes del Estáu.

Compra discu “N.O.S.” na tienda online y siéntilu nes plataformes dixitales