El Taller de Músicos de Xixón regala’l llibru con CD y DVD dedicáu a la figura de Berto Turullla
En payares de 2019 el Taller de Músicos de la Fundación Municipal d’Educación, Cultura y Universidá Popular de Xixón, creaba la Colección René de Coupaud. Trátase d’una serie de publicaciones dedicaes a documentar, catalogar y caltener el patrimoniu musical asturianu y, sobre manera’l xixonés, cola edición de llibros-CD monográficos dedicaos a compositores, intérpretes o repertorios. ‘Berto Turulla. Una mirada moderna a la música popular de Asturias’ ye la segunda obra qu’editaron y de la que tovía pue algamase un exemplar de baldre contactando al corréu tallerdemusicos.fmc@gijon.es.
Esti llibru con CD y DVD ye un volume dedicáu a la figura del teclista Alberto Martínez Berciano (1957-1983), más conocíu como Berto Turulla. Un músicu que tuvo especial relevancia dientro del panorama asturianu de los últimos setenta y primeros ochenta, en delles estayes: como músicu acompañantes de figures del Nuevu Canciu Astur, como compositor y instrumentista venceyáu al rock progresivu y al denomáu rock “con raíces”, como pioneru nel usu de los sintetizadores analóxicos n’Asturies; o como renovador de la música asturiana, con un güeyu puestu nel repertoriu tradicional y otru na fusión coles nueves tecnoloxíes. Too ello refléxase nun llibru de 48 páxines firmáu pol Doctor en Musicoloxía Eduardo G. Salueña, nel que s’inclúin abondes semeyes (delles inédites) y se repasa la so trayectoria xunto a artistes como Carlos Rubiera, La Turulla, Xulio Ramos, Manolín “El Nietu Celo Xuan”, Latin Show, Cuélebre o Lena Sánchez.
El CD inclúi, ente otres, una remasterización fecha de la bobina orixinal en cuatro pistes de la pionera grabación de Carlos Rubiera sel single “Aquella palombina / Les campanes nel alba”, asoleyáu por Conceyu Bable en 1976; una improvisación esbillada d’eses mesmes sesiones de grabación, anguaño consideraes históriques; un conciertu en 1978 de La Turulla nel Pabellón Municipal de Deportes de L’Arena (Xixón); y una versión esbillada de la maqueta orixinal de la orquesta Latin Show.
El DVD inclúi, como conteníu principal, el documental Berto Turulla (1957-1983) dirixíu pol hermanu de Berto, Roberto Martínez Berciano. Nél fáise alcordanza del llegáu del músicu al traviés del testimoniu d’abondes figures de la música asturiana y de compañeros y compañeres que compartieron esperiencies profesionales con él. El documental recueye dalgunes imáxenes históriques en video de la grabación nel llagar de Carlos Rubiera, o del conciertu homenaxe que-y ficieron n’El Molinón. Como conteníu estra hai dos reportaxes cedíos pol Archivu RTVE Asturies emitíos en 1978, ún con una entrevista y actuación de Nuberu na que participa Turulla y otru cola intervención musical de Pau Riba y el grupu La Turulla; amás d’un homenaxe al músicu xixonés que presenta una cuidada escoyeta de semeyes con l’ambientación musical de la pieza “Dexái al cuélebre dormir”, suite escrita por Eduardo G. Salueña y grabada pol grupu Senogul, na que se citen delles melodíes orixinaries de La Turulla y Cuélebre, asina como guiños estilísticos a les sos distintes etapes y la omnipresencia del tema “El Pericote”.
Cómo pidir un exemplar de baldre
Esta edición ye gratuita. Pue pidise un exemplar a traviés del corréu tallerdemusicos.fmc@gijon.es, indicando nome, apellíos, teléfonu y corréu electrónicu; y dende’l Taller de Músicos van dexar -hasta que queden esistencies- un exemplar na recepción del Centru de Cultura Antiguu Institutu pa que la persona interesada puea recoyelu n’horariu d’apertura al públicu. Si la persona nun pue dir físicamente, los coordinadores d’esta colección unvíen l’exemplar con una empresa de mensaxería y el destinatariu tien que pagar el coste d’unvíu al recibir l’exemplar.
