Dempués d’asoleyar el so primer discu n’agostu, La Banda Latira publica un videoclip a mou de teaser del proyectu nel que suena’l tema instrumental ‘Lorient 3h du mat». El videu, qu’espeya’l carácter enérxicu y folixeru de la formación, ta dirixíu y realizáu por Javi Lueje y Rubén Arena, qu’escoyeron delles llocalizaciones del conceyu de Sotu’l Barcu: la playa de Los Quebrantos en San Xuan de L’Arena y la rodiada del Castiellu de San Martín. La Banda Latira son Diego C. Camiña (percusiones y voz), Floriane Legros (curdión y voz), Rodrigo Joglar (gaita asturiana y voz), Marta Río (percusiones y voz) y Nico Radin (saxofón barítonu, voz y direición artística).
L’álbum de La Banda Latira ta formáu por once temes qu’entemecen les músiques tradicionales d’Asturies y Bretaña cola composición propia, emplegando ritmos y armoníes, tamién, d’estilos contemporáneos como’l funky, l’afrobeat o el rock. Con esti videoclip, nel que la banda viste la so indumentaria pa les actuaciones, amuesen una vez más el so compromisu pa cola estética acordies col repertoriu y el formatu de cai pal que ta pensáu.
Suscríbite a les nuestres novedaes
