Tres d’adelantar el prólogu n’esclusiva a MUSICASTURIANA.COM y de presentalu’l pasáu xueves n’El Arca de Noé de Xixón; yá ta la venta Diarios d’una panderetera, el primer llibru de Leticia Baselgas. La componente de L-R, cantante, panderetera, artista visual y doctora n’Arte na Universidá d’Uviéu publica con La Fabriquina esti trabayu de 150 páxines que xira alredor de conceptos como la tradición, la identidá y l’autenticidá, dando forma a una obra d’interés pa quien busque afondar nos símbolos que construyen la idea d’Asturies y pa cualquier persona interesada nos procesos de recuperación y reproducción de la tradición.
Con ritmu cinematográficu y la guía d’una documentada brúxula teórica, Baselgas rellata les sos primeres esperiencies nun grupu de baille marcaes pola disciplina y l’imaxinariu folclóricu posfranquista; el so posterior desencantu cola música tradicional y el rigorismu etnográficu; y, pa remtar, la so llegada al conceptu de post-folk-asturianu como un espaciu de llibertá creativa. Asina ye que la cultura de raigañu ta bien presente nesta obra; la so autora lleva reflexonando alrodiu d’ello de magar yera una neña y , agora, aborda en forma d’ensayu nestos diarios personales escritos per más de dos décades.
Cola publicación d’esti llibru de Leticia Baselgas, La Fabriquina estrena la colección d’ensayu «Manifiestu«, cola busca recoyer l’actual pensamientu asturianu nun formatu breve y accesible. Xunto a otros trabayos yá publicaos por esta editorial como Nunca Vencida o Asturianes, medra la lliteratura rellacionada cola identidá, historia y cultura del país.
Suscríbite a les nuestres novedaes
