La Banda Sonora de Juan Yagüe

Juan Yagüe (Mieres, 1992) ye ún de los guitarristes más pluriempleaos de la música asturiana. Va más d’una década entamó a tocar en La Patriband Folk Orl.lestra y anguaño fáilo con Cerezal, Algaire y José Manuel Tejedor. Con estos dos últimos proyectos musicales ta acabante de publicar los discos Coral y Maera y Lluz, que te presentando en directo per una montonera d’escenarios de dientro y fuera d’Asturies.

Con él siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora de Juan Yagüe

Un discu qu’enxamás canses de sentir.

Ye difícil quedase namás con unu, pero reconozo que cada vez que siento Salia, de Corquiéu, parezme un discu maxistral.

Si tuvieres que formar parte d’otru proyectu musical, ¿cuál sería?

Dalgo acústico, de formatu pequeñu y con influencia americana tipo The Milk Carton Kids, Nickel Creek, I’m With Her, Los Hermanos Cubero…

De los cantares que compusisti o interpretes, ¿cuál ye’l to preferíu?

Unu de los que más me presta pue que seya “Llingua de Cristal”, un tema que ta nel primer discu de Cerezal (Camín), y que me paez que ye de les meyores coses que salieron del llápiz del mio compañeru, Gonzalo Pumares. Respígome cada vez que lu siento o lu tocamos en directo. 

«Ye mui desconocío y creo que nun se-y da’l valir que debería tener tol esfuerzu, dedicación y hores de sacrificiu qu’hai detrás d’un proyectu musical»

¿Cuándo foi la primer vez que xubisti a un escenariu y que pasó enantes, durante y depués?

Siendo bien pequeñu, nos festivales de cursu del Conservatoriu/Escuela de Música de Mieres y nos Alcuentros d’Escueles de Música Tradicional fueron les primeres veces nes que tuvi oportunidá de xuntame con otros músicos y amigos, de los que con munchos sigo calteniendo amistá y proyectos anguaño. Creo que fueron esperiences clave tanto pa mí como pa otros muchos escolinos d’eses edaes.  

Creo recordar que tanto l’enantes, como’l durante y el depués yeren un amiestu de nervios, rises y amistá, pero sobre too, ganes de pasalo bien faciendo lo que más nos gustaba. 

¿Qué ye lo más inxusto de ser artista?

A pesar de que nun ye’l mio casu porque nun vivo de la música, dame muncha pena’l poco respetu y seriedá que tien la sociedá en xeneral pa cola profesión de músicu, sobre manera a la xente que se gana la vida con ello (típica pregunta de: “Aparte de ser músicu, ¿a qué te dediques?” y demás…). 

Tamién ye mui desconocío y creo que nun se-y da’l valir que debería tener tol esfuerzu, dedicación y hores de sacrificiu qu’hai detrás d’un proyectu. El tiempu que se ta nel escenariu namás ye’l resultáu d’un montón de trabayu “extra” que a veces queda en segundu planu.

Si fueres Conseyeru de Cultura, ¿qué son les primeres coses que fadríes?

Ensin dulda, tratar de qu’haiga una presencia mayor y de meyor calidá en medios de comunicación d’artistes asturianos. Creo firmemente que n’Asturies tenemos la tremenda suerte de cuntar con una variedá amplísima de músicos y proyectos de muncho nivel y dellos estilos, y paezme que mereceríen tener mucho más apoyu y visibilidá del que tienen.

«Descubrir a Ígor Medio cuando mios pas me regalaron el discu Yá! teniendo yo malpenes 10 años, foi dalgo clave pa despertar en mí un interés especial pola música n’asturianu»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Uf, la llista de persones y grupos qu’influyeron en mí podría ser eterna. Sicasí, si paro a pensalo, creo que descubrir a Ígor Medio cuando mios pas me regalaron el discu Yá! de Felpeyu teniendo yo malpenes 10 años, foi dalgo clave pa despertar en mí un interés especial pola música n’asturianu.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

A veces presta (incluso pa mí ye necesario), dexar descansar un poco la música qu’escuches davezu y sentir coses nueves, o incluso música que, a priori, nun tienen ná que ver colos tos gustos o intereses. De vez en cuando, pela mio llista de Spotify puen aparecer coses tan estremaes como Perales, Johnny Cash o Vetusta Morla.

¿A qué personaxe públicu convidaríes a un conciertu tuyu, a pasar llueu pel backstage y pa qué?

Ye difícil la pregunta… Pues nun se m’ocurre naide en concreto. Cualquier personaxe públicu, si-y prestó’l conciertu, ta invitáu a pasar pel backstage a falar de lo que quiera.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Con tolos frentes abiertos que tengo anguaño na mio vida, confieso que nun tengo munchu tiempu pa consumir lliteratura n’asturianu, anque una BSO basada nun llibru n’asturianu ye daqué que sí que me despierta interés y más teniendo tan buenos escritores n’Asturies. Too s’andará. 

Asina fala Juan Yagüe de los cantares qu’escoyó pa la so playlist

1. Queda col Vueltu (Alfredo González)

Pesie a qu’esta ye la segunda canción suya que más me gusta (la primera sabe él cuál ye), nun podía faltar nesta llista ún de los meyores (si non el meyor) compositor de canciones que conozo: Alfredo González.

2. Ribesella (Dual)

Poco hai que decir. El tema col qu’abre un discu que marcó un enantes y un dempués na música n’asturianu. 

3. Seique Non (Tejedor)

Con esta canción entama Música na Maleta, el que pa mí ye’l meyor discu d’ún de los grupos más importantes y influyentes de la música asturiana; Tejedor.

4. Onde la Mar (Balandrán)

Descubrí esta canción non pola so versión orixinal, sino pol arreglu que fizo Blima pal so segundu discu, Express. Encantóme dende’l primer momentu que la sentí na voz de Mapi Quintana. 

5. Viquina (Corquiéu)

Como comentaba enantes, unu de los mios discos favoritos ye Salia de Corquiéu, nel qu’apaez esta ayalga. Amás de la so calidá como bouzouquista, pa mí la voz de Paul Balmori ye lo que-y pon la guinda a esti tema. 

6. Cuando Torne la Ñeve (Skanda)

Tema que me trai munchos y mui buenos recuerdos d’un grupu col que crecí y que son como familia pa mí. 

7. Azul y Gris (Toli Morilla)

La discografía de Toli Morilla tien auténtiques maraviyes, y “Azul y Gris” ye una d’elles. 

8. Rumba d’El Corralín (L-R)

La mio favorita d’un discu que, dende’l mi puntu de vista, ta destináu a ser recordáu como ún de los más importantes de la música tradicional asturiana. Esti cantar tiénlo too.

9. La Florentina (Tuenda)

Otru tema fundamental d’un grupu fundamental, como ye Tuenda. Sirva de recuerdu y agradecimientu a Elías García, por enseñanos el camín. 

10. El Branu de Turón (Silvia Quesada)

Ún de los temes que formen La Pena Abierta, el primer trabayu de Silvia Quesada. Discazu de principio a fin.

11. Matalalluna (Llan de Cubel)

20 años d’espera pagaron la pena pa sentir cantares como esti dientro de La Lluz Encesa. Qu’enxamás s’apague. 

12. Ringorrango (Felpeyu)

Ún de los temes que formen Canteros, de Felpeyu. Préstame enforma d’él el trabayu coral, marca de la casa de Felpeyu.

13. Love is All (The Tallest Man on Earth)

La primer vez que sentí a esti cantautor y guitarrista suecu, flipé. Un mayestru de la técnica de finger-picking na guitarra y un gustu pa componer escepcional. 

14. Haul Away (Mark Knopfler)

Podría nun decir ná o podría decilo too. Mark Knopfler ye ensin dulda unu de los mis mayores referentes musicales. 

15. I’ll Never Forget (Rura)

Rura ye ún de los mis grupos favoritos del folk escocés. Esti en concreto, pesie a nun ser un tema tan cañeru como los que los caracteriza, parezme una auténtica maraviya. Con una melodía tan guapa, poco más fai falta…  

16. Kings (Ross Ainslie & Ali Hutton)

Siguiendo col folk escocés, esti par de musicazos nun son namás dos instrumentistes d’un nivel altísimu, sinón que parezme que tán a la vanguardia no que a producción de discos se refier. Tolo que sal de cualquiera de los dos tien un sellu de calidá innegable, y esti tema ye un bon exemplu d’ello. 

17. Fusco (Berrogüetto)

Ún de los mios temes favoritos d’ún de los grupos más importantes y interesantes del folk gallegu. 

 18. Shadows (Tony Rice)

El bluegrass ye un estilu que me gusta munchísimo, y esti tema del recientemente fallecíu Tony Rice ye de los mis favoritos. 

19. Sleeping Tune (Tony McManus).

Quixi acordame tamién nesta llista de los guitarristes folkis. Pudi meter una de Martin Simpson o de Kris Drever, pero llueu acordéme de Tony McManus…

20. Olvídame (Baiuca)

Lo que ta algamando Baiuca allá per onde va, poniendo a miles de persones a blincar en festivales con una propuesta musical basada na música tradicional gallega, ye digno d’almiración.

Mercar discos nos que toca Juan Yagüe