La Banda Sonora de Vítor Carbajal

Vítor Carbajal (Cuideiru, 1976) ye gaiteru y director de la Banda Gaites Llacín. Entamó a los 9 años a tocar na Banda Gaites Avante Cuideiru y en 1995 entamó a trabayar xunto con Nuria Tarodo -la so muyer- dientro de l’Asociación Llacín pa crear la Escuela de Música Tradicional Llacín, de la que trés años más tarde naz la banda gaites qu’anguaño dirixen y cola que tán acabante d’asoleyar el discu Resollu. Amás d’esto, tamién ye docente de música na escuela pública.

Con él siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Un discu qu’enxamás canses de sentir.

Dual, d’Igor Medio y Lisardo Prieto. D’este préstenme los temes ‘Las l.laranxas de balsera’ y ‘Ribesella’. Y nesa mesma llínia’l discu Yá! y, sobre manera, el tema ‘Los Fayeos de Mayo’.

Si tuvieres que formar parte d’otru proyectu musical, ¿cuál sería?

Un proyectu más propiu y diferente nel qu’entemeciera folk y jazz, nun conceptu nel que nun faltara la sonoridá envolvente d’un contrabaxu xunto cola espresividá d’un pianu y la fuercia del vientu metal.

«Si tuviera que formar parte d’otru proyectu musical, sería d’unu más propiu y diferente nel qu’entemeciera folk y jazz»

De los cantares que compusisti o interpretes, ¿cuál ye’l to preferíu?

Teo más d’una trentena de pieces compuestes pa banda gaites, pero son dos a les que considero como fíes y nun pueo escaeceme de nenguna d’elles: ‘Resollu’ y ‘Xideces’.

¿Cuándo foi la primer vez que xubisti a un escenariu y que pasó enantes, durante y depués?

Llevo cuarenta años nel mundu de la gaita y más concretamente de les bandes de gaites, y al rodiu d’elles siempre fueron les mios xubíes al escenariu. Munches d’elles mui prestoses en Festivales como’l de Lorient, o tamién collaborando cola Banda Gaites Llacín con artistes como Hevia, Carlos Nuñez, Tejedor, Felpeyu, Corquiéu o Dixebra. La primera vegada escaecíla, pero quédome cola última y más recién, na presentación del discu Resollu. Nesta ocasión la madurez de los 50 fíxome xubir mui convencíu de facelo pa esfrutar dafechu. Enantes de xubir sentí nervios, los dos primeros temes ficiéronme siguir nesa dinámica, pero a partir del terceru fizo que la nueche fuera inolvidable pa toos.

¿Qué ye lo más inxusto de ser artista?

Que nun te consideren como tal.

«El mio primer discu foi un vinilu de ‘Deva’ de Llan de Cubel y la mio guah.a llámase Deva. Aquel discu marcó los mios anicios musicales y la mio trayectoria y vida»

Si fueres Conseyeru de Cultura, ¿qué son les primeres coses que fadríes?

Nunca sedría conseyeru, yá que me paez un llabor mui importante pa la que nun me veo preparáu. Pero entiendo que la base tien que tar en sentir y dialogar. Asina too, daría continuidá a Cultura en Rede porque facilita la llegada de la música asturiana a tolos públicos de tolos conceyos por pequeños que seyan y da sofitu a les formaciones y artistes asturianos. D’otra manera trataría de facer lo mesmo nun planteamientu de base sofitando con más ayudes económiques a les escueles de música y danza.

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Ensin dulda, Llan de Cubel. La mio vida profesional desendólcase nel Conceyu Llanes, pero los mios anicios musicales dánse nel pueblu nel que nací, Cuideiru. Llan de Cubel yera y ye un referente mui potente na música folk asturiana y pa min, como pixuatu, muncho más. El mio primer discu foi un vinilu de Deva de Llan de Cubel y la mio guah.a llámase Deva. Aquel discu marcó los mios anicios musicales y la mio trayectoria y vida. El discu IV marcóme muncho tamién; ‘La Llonxana’ y ‘Rigu Esva’ treslládenme al tiempu a los mios años mozos.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Nun me paez que seya pa sentime mui culposu, pero son varies les melodíes que siento muncho na soledá y hai una que por razones varies siéntola munches mañanes na intimidá. Ye ‘El Caruso’ de Lucio Dalla xunto con Pavarotti. Préstame tamién abondo la Ópera. Trabayu al rodiu de la enseñanza musical; peles tardes na Escuela Llacín y peles mañanes como mayestru de primaria na especialidá de música. Tolos díes entro al colexu una hora enantes que’l restu’l profesoráu y emprimo la mañana sintiendo ópera. El folk déxolo pal viaxe de vuelta en coche.

¿A qué personaxe públicu convidaríes a un conciertu tuyu, a pasar llueu pel backstage y pa qué?

A dos d’esos políticos que s’atopen nes antípodes ideolóxiques a ver si la música y dos cerveces los fai retomar les formes propies del diálogu que debería tener cualquier representante que diera exemplu al restu ciudadanos. Munches vegaes da noxu tanta crispación. Pensar diferente nun tien que ser motivu pa enfrentase. Sería bueno ver que la música contribuye nello.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Hestoria universal de Paniceiros de Xuan Bello.