Edu Llosa (Villaviciosa, 1997) entamó la so trayectoria hai más de quince años nel mundu de la música tradicional na Banda Gaites Villaviciosa – El Gaitero, formándose como percusionista y gaiteru. Llueu afondaría nos sos estudios musicales nel Conservatoriu Profesional de Música y Danza de Xixón y nel Conservatoriu Superior de Música del Principáu d’Asturies (CONSMUPA). Multiinstrumentista y polifacéticu -tamién ye luthier-, foi baterista de La Tarrancha y Melandru y actualmente lo ye d’Alienda. Amás ye percusionista na Banda Sinfónica de Xixón y Élite Charanga, y guitarrista d’Abéu. Tamién collabora davezu con otres formaciones, como pudo vese nel IV Semando Fest, nel que tocó percusiones y gaita xunto a Rellume.
Con él siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Nun supiera decir unu concretu porque los mios gustos musicales son mui estremaos y diversos. Munches veces tienen que ver futuros proyeutos, influencies, estaos d’ánimu, novedaes… por dalguna d’elles agora mesmo decántome por Resollu, de la Banda Gaites Llacín. Un discazu, pal mio gustu, trabayáu al detalle que lleva más allá les opciones que tenemos nes bandes de gaites.
El mio suañu de va años ye ensin dulda tocar la batería con Spanta la Xente o Dixebra, grupos referencia na mio formación musical dende qu’entamé a tocar. Por mor de la mio actual formación clásica tamién toi encaminándome pel mundín de les bandes y orquestes sinfóniques. Pero tamién prestaríame abondo metéme más con formaciones folk tocando’l bodhrán, que ye dalgo que nel ámbitu interpretativu téngolo más abandonao pero que préstame muncho estudiar y disfrutar d’él.
«El mio suañu de va años ye ensin dulda tocar la batería con Spanta la Xente o Dixebra, grupos referencia na mio formación musical dende qu’entamé a tocar. Tamién toi encaminándome pel mundín de les bandes y orquestes sinfóniques»
Ensin dulda ‘El Rescamplíu’, d’Alienda. Foi la composición estrella del añu pasáu, cola que tuvimos nominaos a meyor canción folk nos Premios AMAS y un tema que dende’l primer momentu foi recibíu por tolo alto, sobre manera nel Festival Interceltique de Lorient onde prácticamente estrenámoslu. Tamién foi’l cantar principal del Festival Internacional de la Gaita 2025. Pa mi ye una pieza que t’activa, motiva, pide baillar y disfrutar con ella.
Diría que cola Banda Gaites Villaviciosa nel 2010, cuando entamé nel mundu la música tradicional asturiana. La verdá que tuvi munches primeres oportunidaes a lo llargo la mio carrera en base al proyectu nel que tuviere, dende bandes de gaites hasta conciertos como solista. La verdá que como tou: nervios, dalgún mieu d’última hora, duldes… pero considero que dende siempre solventé muncho eses situaciones. Malpenes púnxime nerviosu tando enriba l’escenariu, obviamente nun voi decir que siempre foi too perbién, pero lo bueno de too ello ye que siempre deprendes pa la siguiente. Disfrutes lo bueno, analices y meyores lo malo, y la siguiente vegada ye siempre meyor que la primera. “Tener tables”, como dicen.
Esti tema ye complicáu, nun sabría per ónde entamar, pero ensin dulda más que regulación de lleis y derechos, considero que primero de too la sociedá tien qu’entender bien esti llabor y respetalu. Opino que nun se puede ameyorar nada que la xente de la cai nun valora, apoya orespeta. Paezme esencial. Que se nos respete como músicos, trabayadores que somos, valoranos y apoyanos. Entamar per abaxo.
«De guah.e entamé faciendo bateríes colos calderos que topaba per casa, y alcuérdome bien de poner música d’Hevia y Carlos Nuñez de fondo y tocar o facer dalgo similar enriba d’ello. La Banda Gaites Villaviciosa tamién foi y ye gran referente pa mi, yá que foi l’orixe de tolo que llogré hasta agora»
Nin tengo vocación de políticu ni me veo nel llugar. Pero tolo que dixe na rempuesta anterior sumao al patrimoniu musical de la tierra ye un bloque que debería protexese y fomentalo pa xeneraciones futures. Siempre va haber dalgo que facer.
De guah.e entamé faciendo bateríes colos calderos que topaba per casa, y alcuérdome bien de poner música d’Hevia y Carlos Nuñez de fondo y tocar o facer dalgo similar enriba d’ello. La Banda Gaites Villaviciosa tamién foi y ye gran referente pa mi, yá que foi l’orixe de tolo que llogré hasta agora. En xeneral según fueron pasando los años y yo formándome, conociendo xente, teniendo nueves oportunidaes… fui bebiendo de muncha xente y grupos. Nun sabría decitelos toos.
«Confieso que cola música pachanguera, d’orquestes de prau, de charangues… a veces móntome yo solu una bona fiesta interna. Por exemplu, y perdonáime, pero actualmente toi engancháu al grupu viral Nueva Linea»
Los mios gustos lliteral que van d’estremu a estremu. Tan pronto escucho a Debussy como lo nuevo de Bad Bunny. Préstame conocer tola música posible. Obviamente hailes que me llamen más qu’otres pero tengo la suerte de que poques veces faigo-yos un feo, pensando siempre en que ye conocimientu pa mi. Nunca sabes cuando pue ser útil. Pero confieso que cola música pachanguera, d’orquestes de prau, de charangues, digamos, a veces móntome yo solu una bona fiesta interna. Por exemplu, y perdonáime, pero actualmente toi engancháu al grupu viral Nueva Linea.
Una persona mui referente pa mi ye Adam Brown, guitarrista y bodhran n’Imar y Rura. Ensin duda prestaríame tomar una cerveza con él y falar de música. Otra gran referencia ye Miguel Lamas, baterista gallegu, pa mí de los meyores; el meyor d’Europa agora mesmo. Pero si pues escoyer, discrepo de personaxes públicos y quédome cola xente que m’arrodia y sofita no que faigo. Los y les que siempre tán no bueno y lo malo.
Llamentablemente, y con vergoña, nun pueo responder esta entruga porque lleo mui mui poco; por desgracia, muncho menos de lo que quixera. Llibros d’organoloxía, métodos, historia de la música tanto occidental como asturiana y dalguna novela que voi pasín a pasu… muncho vinculao a proyectos nos que toi trabayando agora mesmo. Poro, nun sería el más indicáu agora mesmo pa facer una banda sonora (anque tampoco diría que non).
DÍAS MEJORES – Banda Gaites Camín de Fierro. Esti tema, dientro d’una banda gaites pero con un conceptu más rockeru, apórtame enerxía nos malos y bonos momentos, motivación pa siguir colo que faes y tirar palantre. Paécenme impecables los arreglos y adaptación fechos por ellos, un conceptu bastante innovador pero empastiáu a la perfección.
RESOLLU – Banda Gaites Llacín. Estos últimos meses centréme muncho en sentir muncha banda gaites por un proyectu nel que toi trabayando. Pa mi el discu nuevu de la Banda Gaites Llacín ye la mayor referencia que puedo tener nesti momentu, pola amplia variedá de temes y lo bien arreglaos y detallaos que lo ficieron. Una inspiración imprescindible.
SALÍI LLOKES – La Tarrancha. Tuvi los últimos 10 años como batería en La Tarrancha y foi de les meyores esperiencies que tuvi hasta la fecha. Amás tuvi la suerte de participar na grabación del discu onde sal esti cantar. La Tarrancha siempre ye bueno, zarren la romeria por tolo alto, nun apares de baillar y disfrutar. Cada tema ye dalgo nuevo, sensaciones diferentes pero siempre bones vibraciones. Nun conozo a nadie que nun-y preste esti grupazu.
CATRIOGA‘S– Rura. Esti tema tresmíteme paz, tranquilidá, desconexón del día, relax… Rura siempre foi y serán de los mios favoritos. Tolo que faen tien una precisión y un detalle impecable, diría que rozando la perfección. Nunca dexen indiferente con nada.
REVERSE – Elephant Session. La primer vez que los vi en directo enamoréme d’ellos y sería otru grupu nel que me prestaría tocar. La música que faen, mui moderna y innovadora dientro del folk -si realmente deberíamos consideralo folk (tengo les mis dudes)- tresmíteme toles bones sensaciones que puede tener la música. Siéntome a gusto escuchándolos, tea onde tea.
ESNALAR – Llangres. Esti tema tresmíteme allegría, mirar palantre y siguir colo que seya que faigas. Como bien diz el títulu, «Esnalar», garrar aire y llanzate a poles tos metes. Llangres sería ún de los grupos nos que me tuviere prestao tocar.
LUMBRÍA – Abeu & Rellume. Esti cantar amás de ser ún de los qu’asoleyamos col mio grupu Abéu, tien la collaboración especial de Rellume, un grupu mozu de pandereteres qu’amás de tar subiendo nel mundín son trés grandes amigues, coles qu’amás tuvi suerte tamién de facer dalguna collaboración. Xuntámonos xente mozo, ambicioso, con ganes d’apostar pola música tradicional, xente bueno….
EL NATAHOYO – Dixebra. Dixebra, amás de ser ún de los grupos colos que me prestaría tocar, siempre fueron y serán influyentes pa mi dende qu’entamé a tocar. La so música firme, contundente, los sos mensaxes, la enerxía del directu… escuches la qu’escuches, nunca te dexen indiferente. Siempre con gana de más.
DICEN QUE VAN A PONER – Spanta la Xente. Otra gran referencia de siempre pa mí. Un tema basáu en cantares de chigre, cargáu d’enerxía, nun pue incitate a más que tomar una, cantales al altu la lleva, disfrutales y saltar y baillar.
TEMERARIO – ITACA BAND. Esta pieza conocíla gracies a la mi charanga ÉLITE, Un tema enérxicu, cañeru, pero al empar mui frescu. Itaca Band pa mi ye un grupu con amplia variedá estilística, que t’anima y da buen rollu. El so discu Temerario mui recomendable, por cierto.
COMO’L CUÉLEBRE – Alienda. Pa mi el tema con más mensaxe que tenemos n’Alienda. Toi de ver a la xente coreala nos conciertos al altu la lleva, toos xuntos, de manera emotiva. Esti tema tresmíteme muncha calma pero a al empar enerxía mesmo tocándolu que sintiéndolu.
20 DE ENERO – La Oreja de Van Gogh. D’ente los primeros grupos qu’entamé a sentir La Oreja de Van Gogh foi ún d’ellos, amas punxi siempre mucha atención a les bateríes de los temes, que pa cuando entamaba a tocar resultábenme fáciles de deprender. Ensin duda marcaron la mio formación.
BORIADA – Corquiéu. Puedo consideralos de los primeros grupos qu’entamé a sentir cuando escomencé a tocar la gaita y el tambor. Siendo un nenu pa mi yeren lo más top qu’había nel momentu y más teniéndolos cerca. Cuando pienso n’influencies folk ensin dulda tán de los primeros. De ‘Boriada’ disfruto muncho’l final cola entrada de la gaita, una sensación mui épica.
SAUDADE – Ocho y medio. Conocí a estos rapazos fai mui poco. Una xente increíble con unos temones tovía más. Xente de casa que trabaya con muncho detalle pero a la par algamen enganchate a les sos creaciones. Lo mesmo que pieces anteriores, dante enerxía pal to día a día.
LOVE ANTHEM – Ibrahim Maalouf. Esti tema foi otra de les mios bandes sonores nel FIL 2025. Tien munchu significáu y sentimientu por mor de la bona xente que conocí y traxe conmigo pa casa, pa mio vida. Cenciellamente… ONY VA, LORIENT!!
RHENIGIDALE REEL– Face the West. Voi confesar qu’esti grupu salióme en Spotify por artistes asemeyaos d’otros que sentía, pero l’estilu que tienen, dándo-y la vuelta a la música folk, nesti casu escocesa, amestao con mezcles más electróniques y discotequeres, son de lo meyor que sentí hasta’l momentu. Nun suelo salir muncho de fiesta, pero si me dicen que van poneme esti discu tola nueche quedaríame hasta’l pieslle.
LA LUNA ME SABE A POCO – Marea. Marea siempre acompañen nes buenes y nes males. Tanto na música como nes lletres siempre topes dalgún tema que te faiga sentir meyor o acordies a una situación. Son increíbles, tanto en CD como en directo. Na mio opinión, atrévome a falar d’ún de los grupos más versátiles emocionalmente.
TODO – Pereza. Polo xeneral siempre tuvi presente nos mios gustos musicales al pop español, y como yá nomé dalgún grupu anterior, Pereza (incluso Leiva) siempre tuvieron y tendrélos presentes. Canciones con mensaxe, cencielles, pero detallaes, que te faen parar a sentiles y disfrutales. Tamién almiro esta música pol estilu de la batería, qu’en munchos casos va de la mano d’una gran referencia mía, el batería y productor Jose Bruno.
BOLERO – Maurice Ravel. La música clásica ta presente a diario na mio rutina, tanto por formación como por descansu. El ‘Bolero’ ye una pieza esencial pa los percusionistes, qu’amás uso davezu como métodu de calentamientu y estudiu. Una obra mui recomendada pa quien nun tea habituáu a esti xéneru; pa sentate, relaxate y disfrutala.
Suscríbite a les nuestres novedaes
