La EMT Manolo Quirós d’Uviéu convoca una bolsa de trabayu

La Escuela de Música Tradicional Asturiana Manolo Quirós, perteneciente al Ayuntamientu d’Uviéu, ta acabante de sacar una convocatoria pa facer una bolsa de trabayu na categoría de Monitores de Música Tradicional. Hasta’l 11 d’avientu pueden presentase solicitúes a les siguientes especialidaes: monitor d’aerófonu de llingüeta doble de la tradición asturiana y conxuntu tradicional asturianu, monitor de tonada, monitor curdión diatonicu, monitor de percusión tradicional asturiana (tambor). monitor de baille, pequeña percusión y investigación folclórica; y monitor de zanfona, rabel y folclore. Toles bases de la convocatoria tán publicaes nel BOPA.

Según les bases «l’oxetu d’esta convocatoria ye facer una bolsa de trabayu o llista d’aspirantes pa la provisión de puestos de trabayu por personal interín na categoría de Monitor de Música tradicional (grupu C, Subgrupu C2), a efectos de sustituir a los titulares del correspondiente puestu de trabayu nos supuestos d’escedencia, permisos, llicencies o causes análogues pel tiempu durante’l cual se caltengan les circustancies mentaes y dientro del Conveniu del Personal Llaboral del Ayuntamientu d’Uviéu».

La vixencia de la bolsa d’empléu va ser por tiempu indefiníu y mentanto nun s’alcuerde la so renovación o s’agote la mesma dientro de cada especialidá y pa poder acceder al Concursu-Oposición fai falta tar en posesión del Títulu de Graduáu Escolar, ESO o equivalentes. Van valorase cuestiones como la esperiencia profesional, poseer titulación oficial d’enseñances musicales, cursos de formación y otres cuestiones como premios, publicaciones, discografía y conferencies impartíes. Amás, pa cada optar a cada estaya hai que pasar una preba na que’l tribunal va valorar aspectos técnicos y interpretativos.

Solicitúes hasta’l 11 d’avientu

Tal y como indica la web del Conceyu d’Uviéu, les solicitúes han presentase enantes del 11 d’avientu nel Rexistru Xeneral del Ayuntamientu d’Uviéu (C/ Quintana 6-8) o nes formes previstes nel art. 16 de la Llei 39/2015 de 1 d’ochobre de Procedimientu Alministrativu Común de les Alministraciones Públiques.