Abiertu’l plazu pa inscribise na segunda edición de Dinamiz-ARTj, el programa cultural nes zones de «transición xusta»
Más de 1.000 actuaciones en 136 municipios del Estáu español qu’algamaron más de 80.000 espectadores. Esi ye’l balance de la primer edición de Dinamiz-ARTj, un programa incluyíu na Red Cultural del Instituto para la Transición Justa (ITJ) que nació col enfotu de xenerar una ufierta cultural amplia nos conceyos que s’enmarquen dientro de les llamaes «zones de transición xusta», que son aquelles afectaes pol pieslle de mines de carbón y centrales térmiques o nucleares. La iniciativa xestionada pola Fundación Ciudad de la Energía (CIUDEN) entama una segunda edición na qu’hasta’l 11 d’avientu puen inscribise artistes y ayuntamientos.
Tola información pa la participación ta nes bases del proyectu, qu’esti añu incorpora dos novedaes: van poder participar compañíes, grupos y artistes individuales de música, danza o teatru y, ente los artistes, namás van incluyise nel catálogu los que polo menos la metá de los componentes seyan naturales o residentes de, nel casu d’Asturies, un total de veintisiete conceyos: seis nel suroccidente -Allande, Cangas, Degaña, Ibias, Salas, Tinéu-; catorce nel Valle del Caudal y Aboño -Ayer, Carreño, Corvera, Xixón, Gozón, Llanera, Mieres, Morcín, Quirós, La Ribera, Riosa, Teberga y Villaviciosa-; y siete nel Valle del Nalón -Bimenes, Casu, Llangréu, Llaviana, Piloña, Samartín del Rei Aurelio y Sobrescobiu-. Amás van tener prioridá quienes cunten con una titulación superior oficial rellacionada cola disciplina artística na que se participa y ye necesario que nos últimos cinco años el proyectu musical diera polo menos un mínimo de diez actuaciones.
D’ente toles solicitúes van escoyese un máximu de 400 propuestes a les que se-yos va remunear por actuación el caché fixáu siempre qu’esti tea ente los 400 euros -cuando seyan artistes individuales- y los 2.000 euros -pa grupos de cinco o más componentes-. Na edición del añu pasáu participaron grupos de la música n’asturianu y gallego-asturianu como Caldo y Os Rabizos, Cerezal y Slum Suit.
Dinamización llocal y cultural
Nesti videu pue vese un resume de la anterior edición y ye na web de Dinamiz-ARTj onde los artistes y ayuntamientos interesaos en participar tienen que presentar les solicitudes online pa poder apuntase nesti programa enantes del 11 d’avientu. Con esta novedosa iniciativa el Ministeriu pa la Transición Ecolóxica y el Retu Demográficu quier xenerar actividá a traviés d’un elementu dinamizador como ye la cultura; complementar la ufierta turística nos conceyos onde van desendolcase les actuaciones y favorecer l’intercambiu social con accesu gratuitu a les actividaes culturales. Amás, busca dinamizar los espacios escénicos llocales, especialmente aquellos bienes patrimoniales de calter minero-industrial, aumentando l’actividá que se desendolca nos mesmos.
