2023 foi un añu perbono pa la industria musical nel conxuntu del Estáu español. Promusicae (Productores de Música de España) y APM (Asociación de Promotores Musicales) publicaron apocayá les cifres del volume de facturación: 520 millones d’euros na industria de la música grabada y 578 millones na industria de la música en vivo. Los ingresos medraron un 12,3% y un 26% respectivamente en rellación a 2022, lo qu’amuesa l’auxe de la música como sector económicu.
Según l’informe Mercado de la Música Grabada en España 2023 de Promusicae, los 520 millones facturaos suponen el máximu históricu dende 2006. Sicasí, tovía ta un 37% perbaxo de les cifres de 2001, cuando entamó la crisis de la piratería y la reconversión dixital. Analizando la facturación de les distintes estayes de la música grabada pue observase como’l streaming representa’l 77,6% de la facturación; la venta física’l 11,9% (ésta aumenta en rellación al añu pasáu gracies al puxu del vinilu); los derechos de propiedá intelectual el 9,6% y les sincronizaciones un 0,8 %.
Per otru llau, l’Anuario de la Música en Vivo qu’acaba de publicar APM afita que’l mercáu de la música en directo vuelve a algamar un récord históricu de facturación gracies a los 578.995.737 € recaudaos nel Estáu español por venta d’entraes pa conciertos y festivales. Los datos qu’ufre p’Asturies, son d’ocho millones d’euros facturaos en 2023. Esto representa’l 1,42% del total de facturación, asitiándose nel puestu númberu 23 en comparación con otres provincies. Pesie a la recuperación, la venta d’entraes pa eventos, el nuestru país sigue tando perbaxo de les cifres qu’algamó en 2017.
Suscríbite a les nuestres novedaes
