Na nueche d’ayeri La Guarida del Cunqueiru anunciaba’l fallecimientu de Rosa Rodríguez, conocida por tol mundu como Rosa Cunqueira. Nacida en Sistierna, n’Ibias, en 1971, Rosa foi una persona fundamental nel caltenimientu de la cultura y la música tradicional, concretamente del suroccidente asturianu. Panderetera, fía de la tamién panderetera Mari Luz d’El Corralín, foi responsable de La Guarida del Cunqueiru y impulsora d’iniciatives venceyaes a los sones del país como la escultura A Panderetúa di Trabáu, CachuFest y Música y Tradición, amás de caltener la cultura cunqueira y el dialectu tixileiru del asturianu.
Tamién foi una firme defensora del mundu rural, apostando por vivir y trabayar ellí y reivindicando meyoríes pal so desarrollu. Una persona lluchadora y firme, a la par que con un gran corazón, polo que ye mui querida por tola xente que la topó nel camín. Por toes estes razones y más, llevó la distinción del Premio a la Mujer Rural de Asturias 2022 que concede’l Principáu d’Asturies.
Rosa Cunqueira morrió n’Italia, onde taba recuperándose de les graves mancaúres sufríes nun accidente d’autobús el pasáu ochobre nel que finaron 21 persones. La so familia y allegaos, a traviés del Instagram de La Guarida del Cunqueiru, anunciaron el fallecimientu y recordaron los meses de desgaste pelos que lleven pasando. A la par, anunciaron que nun van facer nengún actu de despidída y agradecieron toles muestres de cariñu.
La última cunqueira
Rosa Rodríguez foi hasta’l momentu la última muyer artesana cunqueira. El so cuñáu Vitorino García, fináu hai cuatro años, foi tamién de les persones que más puxó pol caltener esta cultura centenaria. Güei, el fíu de Rosa, Víctor García, ye quien sigue cola tradición tixileira, trabayando y reivindicando un mundu rural vivu.
Suscríbite a les nuestres novedaes
