Ayeri celebróse una Fuelga Xeneral y unes movilizaciones históriques en defensa del derechu a la vivienda. Les cais del país desbordáronse nes distintes convocatories, poniéndose’l ramu a la xornada de llucha con una manifestación masiva n’Uviéu qu’axuntó a más de 50.000 persones. La música’l país nun ye ayena a estos tiempos de desixir xusticia social y esta mesma selmana coinciden trés fechos destacaos protagonizaos por Víctor Manuel, Nacho Vegas con integrantes de La Caxa Músicos de Xixón, y Rodrigo Cuevas.
La primera d’elles tuvo llugar esti martes 10 en Madrid, nunos actos entamaos polos sindicatos CC.OO y UXT p’animar a la xornada de fuelga xeneral. Ellí’l míticu cantante mierense Víctor Manuel reinterpretó ‘El Cuélebre’, ún de los sos clásicos venceyaos a la música asturiana, cola particularidá de dedica-yla a Donald Trump: “Cambio dinero por jueces y lo multiplico por X mil veces”; “cambio las reglas del juego. Construyo, destruyo moviendo las tejas. Paso de normas, de leyes. Yo solo respeto la ley del más fuerte”… son dalgunes de les frases que’l veteranu músicu dedicó a «un ser obsceno».
Per otru llau, na movilización d’ayeri pela mañana en Xixón coincidiendo cola Fuelga Xeneral, Nacho Vegas y delles persones venceyaes al colectivu La Caxa Músicos de Xixón fixeron un piquete musical percorriendo les grandes cadenes comerciales, multinacionales y bancos del centru de Xixón pa reivindicar vivienda, cultura y dignidá.
El protagonismu de la música’l país nes movilizaciones d’esta selmana remata’l domingu 15 de payares, tamién en Madrid, onde Rodrigo Cuevas va participar xunto a otra montonera d’artistes del Estáu español nel actu «Poder Sindical: el futuro es con vivienda», qu’entama’l Sindicato de Inquilinas e Inquilinos. Un exemplu más de que los y les artistes d’Asturies nun son ayenos a la realidá social que los arrodia y del poder movilizador de la música.
Semeya cedida por Blanca Sopeña.
Suscríbite a les nuestres novedaes
