Hai dos años nació l’Asociación de Profesionales de la Ilustración d’Asturies (APIAST) y, ente la bayura d’actividaes qu’entamen, alcuéntrase la FLIPA (Folixa del a Ilustración Asturiana). Esti sábadu 5 nel Área Recreativa de Santolaya de Morcín celébrase de 12 a 20h la primer edición d’esti eventu de «ilustración, música, foclore y sopreseses» nel que van sonar los sones de raigañu coles actuaciones de Pau Santirso y el gaiteru Diego Fernández.
L’apertura de la FLIPA va ser de 12h a 12.15h y va facese como entamen les coses n’Asturies, con pareya de gaita -Diego Fernández- y tambor. Dempués del discursu d’inauguración la música’l país va volver a sonar de 13h a 14h con un vermú didácticu de música tradicional que va poner Pau Santirso, acompañáu de «Olaya la gaitera»y de varios componentes del grupu de baille tradicional Xeitu,
La cultura de raigañu tamién va tar presente col llegada de Las Aniciadoras, mazcarada tradicional de Piarnu. Amás, tamién va haber otres actividaes como’l conciertu ilustráu del grupu xixonés Ítaca, picotéu, rifes d’obres o intercambiu de postales. A la fin, ye una xornada gratuita pa reivindicar el sector de la ilustración n’Asturies y facer que texa rede con otres manifestaciones culturales del país.
Suscríbite a les nuestres novedaes
