Setiembre entama con 12 cites cola música asturiana d’oriente a occidente. Dende güei hasta’l domingu destaca la celebración de varios festivales: XIX Festival Internacional de la Gaita, La Favorita de Xuan Bello, MECA II Segundu Alcuentru de DJs asturianos y la Romería Cuir. Amás, hasta’l martes tienen llugar dellos conciertos pa festexar el Día d’Asturies, ente los que s’alcuentra la programación entamada pol gobiernu asturianu y polos partíos políticos Aína y Somos Asturies. Too ello cola diversidá que vien caracterizando a l’axenda asturiana, con actuaciones que van dende la tradición y la tonada hasta’l folk, el punk, el hiphop y la electrónica.
— Actos del Día d’Asturies
A Veiga, San Tiso d’Abres y Castropol
Los actos del Día d’Asturies qu’entama’l gobiernu celébrense esti añu en San Tiso d’Abres, Castropol y A Veiga. La música n’asturianu y eonaviego va tar presente coles actuaciones de Bacotexo, José Manuel Tejedor, Mostru l’Horru, Marisa Valle Roso y delles agrupaciones tradicionales y intérpretes d’asturianada.
— XIX Festival Internacional de la Gaita
Villaviciosa
El Festival Internacional de la Gaita (FIG) vien afitándose nos últimos años como ún de los eventos imprescindibles al rodiu la gaita y la música folk n’Asturies, cola participación de los grupos, músicos y bandes de gaites más pernomaos del país y otros territorios.
— La Favorita de Xuan Bello
L.luarca
La música asturiana va tar presente en dos de les sos actividaes: el pregón inaugural y un conciertu de flauta, gaita y pianu con recital de testos de Xuan Bello; too ello cola participación de Flavio R. Benito, músicu col collaboró’l fináu escritor en dellos proyectos.
12:30 — IV Festival La Folixina del RGCC
Real Grupo de Cultura Covadonga
Festival de l’Asociación Coros y Danzas del Real Grupo de Cultura Covadonga de Xixón. Participen la xente mozo de l’agrupación y de l’Asociación d’Intérpretes de Canción Asturiana (AICA).
13:00 — Pau Santirso
Área Recreativa de Santolaya (Morcín)
Tradi-vermú de música tradicional con Pau Santirso na FLIPA, Folixa de la Ilustración Asturiana.
20:00 — Felpeyu
La Guarida, Somáu (Pravia)
Felpeyu ye ún de los grupos más importantes del folk asturianu. Formaos en 1991, lleven más de trés décades reellaborando la música tradicional asturiana al traviés d’un folk acústicu influenciáu poles corrientes de la música celta atlántica y europea.
20:00 — Desaniciu
La Rebollá (Mieres)
Desaniciu ye una banda hardcore, crust y punk directu y combativu que faen que l’asturianu suene dientro d’unos xéneros musicales nos que nun suel tar presente.
13:00 — Bimenes Underprau
Kantina PaisanPizza, L’Infiestu (Piloña)
Bimenes Underprau ye un proyectu d’electrónica y hiphop con lletres n’asturianu de calter políticu y reivindicativu.
13:00 — II MECA. Alcuentru de DJs asturianos
Kuivi Almacenes (Uviéu)
Alcuentru de DJs asturianos, una inciativa col oxetivu d’axuntar y visibilizar a la escena d’electrónica fecha n’Asturies.
14:00 — Los Muiles
Romería Cuir, Les Arriondes (Parres)
Bandina tradicional.
12:00 — Los Gascones y DJ Killaphonia en Xixón
PatiOh! La Laboral, Universidá Llaboral, Xixón
Los Gascones ye una bandina tradicional formada por cinco músicos con un repertoriu de temes tradicionales asturianos y adautaciones de cantares perconocíos del pop, el rock y de tola música popular d’ayeri y d’angüaño. DJ Killaphonia ye una pandereta, voz y electrónica. Raigañu asturianu pa un tiempu nuevu.
13:30 — Rubén Bada en Mieres
Parque Xovellanos, Mieres del Camín
Rubén Bada ye ún de los músicos de folk asturianos con mayor proyección internacional. Vigulineru, guitarrista y bouzoukista que tien tocao y collaborao con una montonera formaciones.
Esta programación ta recopilada a partir de los datos publicaos na axenda de Musicasturiana.com, onde pue consultase más información, horarios actualizaos y llocalizaciones precises pa cada eventu
Consulta la axenda completa equí: https://musicasturiana.com/axenda/lista/
Suscríbite a les nuestres novedaes
