La música va tener protagonismu na 43 Selmana de les Lletres Asturianes dedicada a Ígor Medio

En 2022 Ígor Medio cumpliría 50 años. 16 años depués del so fallecimientu n’accidente de carretera, la 43 Selmana de les Lletres Asturianes va tar dedicada al que fuera ún de los fundadores de Felpeyu, músicu notros proyectos como Dual y dibuxante de cómics, D’esta miente, dende la Conseyería de Cultura, Política Llingüística y Turismu, al traviés de la so Dirección Xeneral de Política Llingüísitca, tán acabantes d’anunciar que yá tán trabayando na edición que’l viniente mayu va tener como protagonistes a les dos disciplines nes que yera reconocíu esti artista xixonés: el cómic y la música.

El programa d’actos col que se va rindir homenaxe a Ígor Medio va tar coordináu pol tamién músicu y autor de cómic Ruma Barbero de Diego, quien en 1991 fundó Felpeyu con Medio, amás de por Norman Fernández Tascón, que ye autor de delles monografíes sobre historieta, amás de comentarista y articulista sobre cómics y collaborador habitual de la Semana Negra de Xixón y d’otros eventos sobre’l cómic asturianu.

Dende l’añu 1980 celébrase cada mes de mayu la Selmana de les Lletres Asturianes, homenaxe públicu y institucional a la creación lliteraria en llingua asturiana. Ye un eventu nel que s’axuntan lo lliterario, lo festivo y lo institucional y nel que participen de manera especial los centros educativos, les llibreríes, les editoriales, los escritores o los medios de comunicación. La edición 35 yá tuvo dedicada al cómic de manera xenérica y la 40 a la música; cola del próximu añu, vuelven a tener protagonismu estes dos disciplines a traviés d’una figura que les encarnaba perfectamente, la d’Igor Medio.

Mercar discos en musicasturiana.com nos que tocó Ígor Medio