Marisa Valle Roso pon a la venta les entraes pal conciertu presentación del so nuevu discu
El 14 de xineru Marisa Valle Roso va asoleyar el so tercer trabayu discográficu en solitario, ‘Lo Fugaz‘, un discu qu’afonda nel camín abiertu col so anterior álbum ‘Consciente‘, entemeciendo canción d’autor y pop, y nel que per primer vez tolos temes son de la so propia autoría. El conciertu de presentación va ser al día siguiente, el 15 de xineru, a les 20h, nel Teatru La Llaboral de Xixón. Les entraes yá tán a la venta na web de la propia artista www.marisavalleroso.com.
Marisa Valle Roso ye una de les artistes más reconocíes d’Asturies. Con namás 16 años ganó’l so primer concursu de tonada; al que siguiríen más de 30 premios nel ámbitu de l’asturianada, xéneru col que publicó los discos ‘Un Pasu Más’ -esti xunto al so hermanu Fernando, col que formaba’l dúu Hermanos Valle Roso-, y ‘De Lo Fondero l’Alma‘, el so debú en solitario. 2017 foi un puntu d’inflexón; asoleya’l discu ‘Consciente’, con temes que s’allonen de la tonada p’amestase al pop o a la canción d’autor, ente otros estilos.
‘Lo Fugaz’ va ser la so tercer referencia. D’ella, yá se pueden sentir los adelantos “Cantemos“, “Desvirtuarte” y “Títere o Esclava“. Producíu por Charlie Bautista (Christina Rosenvinge, Tulsa, Coque Malla…), amestáu por Iván González “Chapo” (MClan, Amaral, Deluxe…). y con dirección d’arte y fotografía de Vértigo Estudio, el discu supón una vuelta de tuerca más al estilu esploráu en ‘Consciente’. Nesti nuevu trabayu nun va haber nengún tema n’asturianu, anque sí dos canciones compuestes a partir de dos tonaes tradicionales y la llingua autóctona sí que va tar presente nel conxuntu del proyectu.
