L’establecimientu La Pimpana de Quirós celebra esti fin de selmana el so segundu aniversariu con una programación musical que va axuntar música improvisada, canción asturiana y folk. Les actividaes van desarrollase del vienres 23 al domingu 25 d’ochobre.
La programación va entamar el vienres, a les 20:30 hores, con una jam session abierta a la participación de músicos y músiques. La propuesta busca convertir l’espaciu nun puntu d’alcuentru pa compartir música de manera espontánea.
El domingu 25, a les 12:30 hores, va celebrase la sesión vermú folk, coles actuaciones d’Arcea y de Carlos Velasco y Chino el Indio. Arcea ye’l proyectu musical del multiinstrumentista Gabriel Salguero Llaneza, que toca instrumentos como’l bouzouki, el bodhrán, l’acordión, les campanes y el vigulín.
Pela so parte, Carlos Velasco y Chino el Indio axunten la tonada asturiana y la guitarra nun espectáculu que revisita clásicos de la canción tradicional. Velasco, ganador del Premiu Obdulia Álvarez «La Busdonga» na categoría masculina, acompáñase de Chino el Indio, músicu conocíu pol so trabayu como guitarrista y cantante en Mota Blues. El proyectu propón una nueva mirada sobre’l repertoriu tradicional asturianu.
Suscríbite a les nuestres novedaes
