Esti domingu 21 d’avientu pela mañana Uviéu va acoyer la primer Madreñada, una cita bien orixinal y necesaria que quier «reconectar la sociedá asturiana con esta parte del patrimoniu al traviés d’un eventu popular, festivu y reivindicativu, que los asistentes sientan como propiu». La música asturiana va acompañar nesta actividá con un conciertu de Carlos Velasco & Chino El Indio acompañaos del multiinstrumentista Dani Álvarez y con una «caminada en madreñes» na que s’anima a la xente a participar con un instrumentu musical.
«La madreña ye un elementu perimportante del patrimoniu vivu, hixénicu, sostenible y prácticu frente a la proliferación de los calzaos de goma, pero que vive un procesu de declive motiváu por dellos estigmes asociaos a ella y a la cultura asturiana en xeneral», comenten dende la organización de la cita. Pa puxar por esti pegoyu de la identidá asturiana, entamen esta Madreñada qu’arranca a les 11h na Catedral d’Uviéu coña visita guiada Historia de la madreña n’Uvieo, fecha pol historiador Denis Soria de Ser Asturianu; continúa a les 12h nel Fontán cola «caminada en madreñes» na que la organización pide a los y les «participantes llevar los sos instrumentos, tocar y baillar»; y remata a les 13h na Plaza’l Paragües cola actuación del cantador d’asturianada Carlos Velasco en compañía del guitarrista Chino El Indio y el músicu Dani Álvarez.
Suscríbite a les nuestres novedaes
