Eva Outeiro, panderetera y musicóloga y Alma Hidalgo, comunicadora y activista cultural, tán detrás del Alcuentru Trad-Urbán, una iniciativa dedicada al estudiu, la tresmisión y el disfrute de la música y el baille d’Asturies y Galicia dende una perspectiva d’anguaño. Esta xuntanza, fía de la filosofía de los Alcuentros de Pandereta Asturiana y Gallega celebraos ente 2005-2015; llega esti añu con un programa completu qu’inclúi talleres, alderiques y foliadas na capital coruñesa.
La mirada cuir, itinerante y actual a la tradición oral astur-gallega d’esti eventu, va ponela pela parte asturiana Raquel Vega, como profesora de pandereta, y Rosa Cuervo y Xesús Torga como mayestros de baille asturianu. Vezos Astures va tar presente tamién na charra propuesta por esti Alcuentru al rodiu del fenómenu de les Mazcaraes Tradicionales, falando del caltenimientu d’Os Reises del Valledor.
Al marxe de les particularidaes d’esti añu, nesta entrevista a Eva y Alma, queremos afondar nel llabor, oxetivos y motivaciones que guíen la organización d’esti Alcuentru Trad-Urbán.
¿Que ye y pa quién ye l’alcuentru trad-urbán?
L’Alcuentru ye un eventu itinerante, hasta agora celebráu ente Asturies y Galicia, que sofita y esparde la música tradicional, principalmente’l cantu, pandereta y baille, ente estos dos marcos xeográficos. La idea surde d’otros eventos col mesmu nome qu’entamaron ente l’añu 2005 y 2015, siendo recuperáu y replantegáu pol colectivu de Uviéu Les Pites y l’Asociación Cultural Trepia de Pontevedra nel añu 2023. Nel Alcuentru vas atopar: talleres de distintos niveles, una espicha, charres y siempres una folixa pa rematar.
L’Alcuentru ye pa xente de cualquier tipu, pa quién quiera averase a la música tradicional, ensin necesidá de nivel o formación. De la mesma forma, ye p’aquelles persones que busquen medrar les sos conocencies. Ye pa la xente con interés, y pa desdibuxar les fronteres de los mapes que tantos lluchen por dignificar; buscando les semeyances y diferencies ente dambos llugares, como puntu d’alcuentru, y non de dixebra.
Imaxinamos que nun ye fácil entamar dalgo asina siendo estudiantes y trabayadores y posiblemente precaries ¿por qué ye necesariu esti alcuentru? ¿Qué ye pa vosotres, a nivel personal, formar parte d’esto?
Amás de too lo que diximos enantes, l’Alcuentru tamién pretende averase a xente mozo, cuir, racializada y disidente. Por eso ye necesariu esti eventu, amás de pa difuminar eses fronteres imaxinaes, pa poder llevar estes músiques y bailles a tol mundu posible, llevando por bandera la divulgación d’esti patrimoniu inmaterial, qu’intentamos curiar y tresmitir con respetu y dende un plantegamientu modernu y actual.
A nivel personal, formar parte del Alcuentru supón de primera mano siguir cola heriede o intención d’aquel colectivu “Trans-Eo”, llevando les sos inquietúes a l’actualidá. N’especial pa Eviña l’Alcuentru ye tamién una materialización en primer persona de tolo que-y enseñó Asturies a nivel cultural, llingüísticu y social na so esperiencia viviendo equí.
«L’Alcuentru Trad-Urbán ye pa la xente con interés, y pa desdibuxar les fronteres de los mapes que tantos lluchen por dignificar; buscando les semeyances y diferencies ente dambos llugares, como puntu d’alcuentru, y non de dixebra. Tamién pretende averase a xente mozo, cuir, racializada y disidente»
¿Qué diferencies atopáis na manera d’entender “lo tradi” n’Asturies y Galicia?
Si bien hai tantes maneres d’entender “lo tradi” como persones esisten, nós, a nivel organizativu lo que notamos ye sobre tou una diferencia nel nivel de recursos o d’esperiencia de cada llugar o colectivu col que trabayamos; ye un eventu itinerante, non solo xeográficamente, sinón tamién nos sos collaboradores, ye por eso que la manera de poder afrontalo camuda cada añu.
¿Cuál diríeis que ye la forma de entender la tradición del alcuentru?
L’Alcuentru entiende la tradición como un fenómenu antropolóxicu y etnográficu de tresmisión de conocimientos de mou xeneracional. Recoyela, estudiala y tresmitila. En concreto, nel Alcuentru especializámonos na música y el baille tradicional n’Asturies y Galicia. Los profesores que participen son siempres xente especializao nesti ámbitu, dende’l puntu de vista del conocimientu del trabayu d’archivu y les recoyíes. D’esta manera, gárrense toos estos materiales, treslladando estos conocimientos a l’actualidá, con una visión cuir, feminista, antirracista y antidiscriminatoria.
«Si bien hai tantes maneres d’entender ‘lo tradi’ como persones esisten, nós, a nivel organizativu lo que notamos ye sobre tou una diferencia nel nivel de recursos o d’esperiencia de cada llugar o colectivu col que trabayamos»
Col diseñu de Nievesita y los reels, paez qu’hai un cambéu visual y audiovisual na promoción del alcuentru ¿Qué diriéis que tien de distintu esta edición de les anteriores?
Anque ye cierto que nes trés ediciones anteriores caltuvimos la mesma estética, si que yera importante pa nós llevar un pasín más esa itinerancia característica del eventu, tamién nel planu de los diseños y nel dixital. Por non decir que ye prestosísimu poder cuntar colos diseños de Nievesita nesta edición, y quiciabes nes próximes, ¡entá nun lo sabemos!
Cada edición ye siempres distinta de la anterior; camuden los collaboraores, los profesores, les temátiques de les charres, el formato de les folixes y conciertos… Y por supuestu, el llugar. Ye por eso que podemos decir qu’esta edición ye distinta dafechu a les anteriores, partiendo siempres de la mesma base.
«Cada edición ye siempres distinta de la anterior; camuden los collaboraores, los profesores, les temátiques de les charres, el formato de les folixes y conciertos… Y por supuestu, el llugar»
¿Que ye lo más difícil d’entamar un eventu como esti?
Sobre manera, lo más difícil d’entamar daqué asina ye algamar tolos recursos necesarios pa facer l’eventu lo más accesible posible, que ye un puntu al que queremos llegar en dalgún momentu.
¿Con qué idea o sensación vos gustaría que quedase la xente dempués d’estos alcuentros?
Prestaríanos que la xente marchara encantao, con coses nueves deprendíes y con un bon sabor de boca: de pasalo bien na folixa y de conocer xente nuevo y tar disfrutando muchísimo.
Pa rematar, ¿Cómo véis el futuru d’esti alcuentru?
Encantaríanos percorrer más llugares de Galicia y Asturies, y tamién tamos pensando n’abrir tovía más esa fronteira, asina qu’aceptamos propuestes tamién.
Suscríbite a les nuestres novedaes
