Pa mí la escena del rock astur pue comparase con una familia. Hai unos «patriarques», Dixebra, que fueron en 1987 los creadores d’esta etiqueta y los que dieron aniciu a esti son con una personalidá que tien como rasgos principales cantar n’asturianu; el venceyu cola música de raigañu -introduciendo la gaita na instrumentación y/o con influencia de pieces tradicionales nes sos composiciones-; y unes lletres reivindicatives. Una década dempués llegaron Avientu, con una curtia trayectoria pero que dexó una buelga que convirtió a esta formación nun grupu de cultu pa muncha xente. Nos primeros años del 2000 llegaría la segunda xeneración; la formada por Skontra, La Tarrancha y Skama la Rede, bandes que siguen güei n’activo. Y, tres de les esperiencies de nomes como Gomeru, Sambre o Fala Non Caduca -grupos que tuvieron tocando dalgo más de cinco años y qu’asoleyar dellos trabayos-, llegó-yos el turnu a los «nietos» del rock astur: Ochobre.
L’embrión d’esta banda presentóse en directo d’una de les meyores maneres que podía estrenase un grupu d’esti calter: nun conciertu del DMR (Día de la Mocedá Revolucionario) qu’entamó Darréu en 2014. Fixéronlo acompañaos de les trés bandes de la mentada segunda xeneración del rock astur y d’Avientu, que pisaba un escenariu dempués de diez años alloñaos d’ellos. Esa formación tovía facía namás versiones d’Avientu, pero aquella nueche Natalia González -gaitera del grupu- yá acolumbró que tenía gana y enfotu de facer camín. Asina ye como a los dos años refizo’l proyectu buscando compañeros de grupu -Viti, Chus, Java y el lletrista Adrián Calvillo faen camín con ella dende 2016-, y con ellos puxó por un Ochobre distintu al que tocó nel DMR. En 2018 llanzaron el so primer EP, Sobredosis de grisú y, tres d’un cambiu de formación que, ente otros, incorporó a esa gran cantante que ye Reichel, tornaron en 2021 col single audiovisual ‘Autodefensa, muyer’, col que sorprendieron cola so evolución.
«La rabia nos dientes ye la obra más completa d’Ochobre y ún de los meyores discos de llarga duración que publicó un grupu de rock astur na última década»
Y asina ye como pasín a pasu llegamos a La rabia nos dientes. Ye la so obra más completa y ún de los meyores discos de llarga duración que publicó un grupu de rock astur na última década -anque tamién ye verdá que muncha competencia nun hai, porque namás asoleyaron discos llargos nesti tiempu Dixebra, La Tarrancha y va unos pocos meses Skama la Rede-. Esti álbum tardó en llegar, cocinóse a fueu sele, y reflexa la madurez del quintetu en tolos sentíos: lletres, composiciones, interpretación, estética… Cierto ye que nun tien la mano del productor de la mayoría de discos del rock astur -Sergio Rodríguez, de Tutu Estudios-, y eso refléxase en que nun suene como tamos avezaos a sentir notros trabayos del xéneru. Sicasí, el grupu y el so productor, Pablo Viña, punxeron tol so ciñu nos nueve cantares que formen l’álbum y parieron unos temazos.
Tres d’unos segundos instrumentales introductorios el discu arranca de verdá con ‘Puxarra’ y tola fuercia del so estribillu. Una declaración d’intenciones, un glayíu de rabia, una respuesta a la opresión moral d’un establishment que combaten a lo llargo de 29 minutos. Llueu aporta ‘Sélo’, el que fuera’l primer single y nel que collabora Pitxe (ex componente de los grupos Falkatrúa, Skontra, Brutus Daughters, Cilvrnigans…), un persona ensin la que nun se podría entender el punk-folk fechu nel Estáu español gracies al so bon facer como compositora, cantante y guitarrista. La lletra ye otra bala contra la inxusticia y la desigualdá, falando de coses que toes y toos sabemos, pero que nun por ello hai que dexar de denunciar y cayer na indiferencia.
«‘Candil’ ye de los temes más novedosos: siéntese’l panderu con un xeitu que malpenes suena notros cantares del rock astur y la lletra afonda na situación del rural asturianu, un mundu al que nun-y cantaren tovía d’esta manera otres formaciones d’estes característiques»
Suena’l panderu nel entamu del ‘Candil’, ún de los temes más novedosos del grupu. Primero, porque introducen esti instrumentu tradicional con un xeitu que malpenes suena notros cantares del rock astur; dempués, pola temática d’una lletra qu’afonda na situación del rural asturianu, un mundu al que nun-y cantaren tovía d’esta manera otres formaciones d’estes característiques. Y llega’l momentu d‘Escuela d’amor’, el cantar más popular d’esta banda en Spotify y un auténticu himnu. La introducción, la interpretación vocal, l’estribillu, los coros y una lletra guapísima dedicada a la música asturiana -brillante «de los cantares en braña a les nueches en danza, del vibratu la tonada al glayíu de la rabia. Recoyimos acordes d’un tiempu pasáu, y la fuercia d’un pogu, tou un llegáu»-, faen d’esti un cantar redondu.
‘Eu d’Asturies’ abre lo que podría considerase como la cara B del discu, si esti s’editara en vinilu. Les feries d’abril y el flamenquismu n’Asturies son la temática d’esti cantar que recuerda a los primeros Ochobre y al que sigue ‘Los naides’, que representa a los Ochobre d’anguaño. Hardcore y metal inflúin al últimu que compusieron enantes d’entrar a grabar el discu y que ye ún de los trés que nun tien una lletra firmada por Adrián Calvillo. El poema ‘Los nadies’ del escritor llatinoamericanu Eduardo Galeano inspira al grupu nesti corte que, como los dos siguientes, ‘Poles bales a Víctor Jara’ y ‘Miseria democrática’, son un cantu al internacionalismu; una defensa a la llucha pola xusticia social en cualquier llugar del mundu, pero colos pies y la mirada asitaos n’Asturies, el país nel que nacen estos cantares. La llinia punk-rock-folk -con momentos scream a la voz- marca a estos temes que dan pasu a la vieya conocida ‘Autodefensa, muyer’; l’himnu feminista col qu’Ochobre anovaron la so propuesta hai cuatro años y que zarra’l CD.
«Ochobre canten al internacionalismu y faen una defensa de la llucha pola xusticia social en cualquier llugar del mundu, pero colos pies y la mirada asitaos n’Asturies, el país nel que nacen los sos cantares»
Remata asina un trabayu col que tola escena de rock astur pue sentir «arguyu y satisfacción». Porque, como dixi enantes, el rock astur ye como una familia; y nun lo ye namás pola llinia xenealóxica mentada; tamién lo ye porque’l bon rollu, la camaradería y l’apoyu mutuu ente los grupos caractericen a una escena comprometida col país y solidaria coles sos lluches sociales. Ochobre son la heriede d’esi llume que prendió Dixebra hai cuasi 40 años; La rabia nos dientes, la confirmación, una vegada más, de que’l rock astur sigue teniendo muncho que decir.
Suscríbite a les nuestres novedaes
