El Premiu Camaretá al Meyor Cantar, promovíu pola Conseyería de Cultura, Política Llingüística y Deporte, yá tien finalistes pa la so edición del 2026: Marisa Valle Roso, Ochobre, Sólo y Tania Pereira. El vienres 2 d’ochobre Xixón va volver acoyer la final del certame nel Teatru de la Llaboral. Nesa gala, el mesmu xuráu va decidir cuála va ser la canción vencedora y Ferla Megía, formación premiada na edición anterior col tema ‘Xatu», va ufrir una actuación.
El Premiu Camaretá al Meyor Cantar ta dotáu con 6.000 euros, la realización d’un videoclip y actuaciones per dellos conceyos del país dientro del circuitu Autores nel Camín. Convócalu’l Gobiernu del d’Asturies cola mira de afianzar, prestixar y arriquecer la creación musical tanto n’asturianu como en gallego-asturianu.
Esti añu’l xuráu tuvo presidíu pola xefa del serviciu de Planificación y Normalización Llingüística, Juncal García, y formáu por profesionales venceyaos a la creación, interpretación y difusión musical y lliteraria en llingua asturiana: Pablo Alonso, Alicia Álvarez, Emma Posada, Andrea Joglar y Xandru Fernández.
Marisa Valle Roso, con ‘La carbonera‘. L’artista llangrana ye una de les voces más reconocibles de la música asturiana. Cantante y compositora, entamó’l so camín dende bien neña nel mundu de l’asturianada y dende hai más d’una década trabaya con otros soníos como la canción d’autor, el pop o la electrónica. Esti cantar ye parte del so discu últimu Cenicientes, dedicáu a la memoria asturiana.
Ochobre, con «Escuela d’amor«. Esti grupu ye’l más destacáu de la fornada nueva de rock astur. La so propuesta entemez soníos como’l punk-rock, el folk asturianu o’l hardcore con unes lletres de calter reivindicativu. Tres más de diez años de trayectoria asoleyaron hai un añu’l so segundu discu, La rabia nos dientes, nel que s’alcuentra esti cantar dedicáu a la escena musical asturiana.
Sólo, con «Foles«. Sólo ye’l proyectu nuevu del cantautor turonés Alfredo González, bien conocíu na escena asturiana y con dellos trabayos publicaos y reconocimientos algamaos. Na so etapa artística nueva presenta una propuesta más íntima y personal, cola qu’esplora rexistros sonoros distintos. Foles ye’l primer cantar n’asturianu que publicó.
Tania Pereira, con «Piquena«. Esta cantautora de Xedré (Cangas del Narcea) lleva faciendo música n’asturianu dende qu’entamó a cantar nel desapaecíu grupu folk Brandal. Na so carrera en solitario, entemez la canción d’autor, l’indie, el pop alternativu y el folk con unes lletres escrites na variante occidental del la llingua asturiana. Esti cantar ta dientro del so trabayu asoleyáu apocayá, Rousa de Xericó.
Suscríbite a les nuestres novedaes
