Esti vienres 3 y sábadu 4 de xunetu el pueblu d’Intriago, nel conceyu de Cangues d’Onís, celebra la XII edición del Maízu Rock, festival imprescindible pa tola escena rock y punk d’Asturies. Esti añu ye bien especial porque’l 28 de xunetu cúmplense dos décades desque se celebró la primer edición y por ello la organización acaba d’asoleyar un videu y un comunicáu col que faen alcordanza de la trayectoria d’esti eventu nel que yá tocaron tolos grupos del rock n’asturianu. Nesta edición son Ochobre, Mala Reputación y Los Vicentos quien van interpretar cantares na llingua autóctona enriba l’escenariu.
«El próximu 28 de xunetu van cumplise 20 años d’aquella primer edición. Aquella primer aventura dexó una alcordanza imborrable, pero dempués llegó un llargu paréntesis. El festival quedó en silenciu mientres unos años, anque la illusión enxamás desapaecio del tou. Siempres tuvo ellí, esperando’l momentu de volver. Y esi momentu llegó nel 2014″, entama diciendo la organización del Maízu Rock nel so comunicáu. Asina ye como dende qu’hai 12 años recuperaron «les ganes, la enerxía y el convencimientu de que merecía la pena devolver la música a la Vega Intriago«, el Maízu Rock celebra que foi medrando pasín a pasu «con trabayu, ilusión y el sofitu de muncha xente».
Nel videu qu’acompaña al comunicáu pueden vese semeyes y fragmentos audiovisuales de toos estos años puxando pola escena rockera dende’l pueblu d’Intriago. Dixebra, Skama la Rede, Skontra, Misiva, La Tarrancha… pasaron n’anteriores ocasiones pel escenariu d’esti festival ensin porgüeyu económicu. Esti fin de selmana van facelo Ochobre pa presentar el so discu La rabia nos dientes y tamién Mala Reputación, ún de los grupos más destacaos del rock estatal que tien dellos temes n’asturianu y que tán acabante d’asoleyar l’EP Queda entre nosotros.
Amás, na sesión vermú va sentise música tradiciona cola actuación de la bandina Los Vicentos y, xunto a ellos, completen el cartelu otres formaciones d’ámbitu estatal: No Konforme, Ritmo Vudú, Deklibe, Rienda Suelta, Maverick y los grupos finalistes del concursu de bandes qu’entamen añalmente. «Como diz esa canciu que tantes vegaes mos acompañó: ‘Nadie nace con el camino marcado, solo uno puede abrirlo paso a paso’. Y eso ye, esactamente, lo que llevamos h.aciendo dende hai 20 años. Construyendo’l nuesu propiu camín, aprendiendo de cada pasu y dexándonos guiar pola música, l’amistá y l’espíritu del rock«, conclúi’l comunicáu.
Suscríbite a les nuestres novedaes
