La tradición oral y la música popular protagonicen la edición nueva d’Una Señora Fiesta

Vegarrionda acueye un añu más Una Señora Fiesta, ún de los festivales del branu asturianu que más éxitu de públicu tien y que dende’l 2018 enllena Piloña de música y d’otres manifestaciones culturales. El formatu d’esti eventu impulsáu por Rodrigo Cuevas camuda davezu con cada edición y esti añu van formalu dos actividaes estremaes: el vienres 17 ye l’alcuentru de narración oral, Filandón, y el sábadu 18 ye la Romería con bandines, baille’l país, concursos y otres actividaes nuna cita nun que va haber música amplificao y pa la que la organización anima a que la xente venga con instrumentos. Otra de les novedaes d’esti añu ye que nun va haber zona d’acampada.

«Cuentos, pallabres, hestories, música, baille… Tolo que mos fai conectar y esfrutar cola xente», asina define la organización d’Una Señora Fiesta el Filandón del vienres 17. A les 20h na Meredal (onde’l Bar de Maribel de Vegarrionda) ye esti eventu nel que participa’l narrador oral Don Guti y otres persones ensin confirmar.

Pal sábadu 18 dende les doce la mañana el Prau de La Bilortera de Vegarrionda acueye la Romería. Nella va haber concursu de picnics, de bañadores, xuegos tradicionales y muncha música’l país. Al nun haber música amplificao, la música tradicional va garrar el protagonismu y, amás de la participación de dalguna bandina ensin anunciar, dende Una Señora Fiesta conviden a la xente a que traiga instrumentos pa facer una folixa participativa enllena de sones y baille’l país.

Toles actividaes son de baldre y la organización sorraya que nun va haber zona d’acampada, una decisión que respuende al nuevu formatu del festival y al compromisu por amenorgar l’impactu ambiental de la cita. Amás anque esti añu va poder pagase con tarxeta, la organización recomienda llevar efectivu, especialmente pa les actividaes de Vegarrionda, onde la cobertura del móvil pue fallar. Por último recuerden que’l respetu poles persones y pol entornu forma parte de la esencia del festival. Por eso, piden caltener l’espaciu llimpiu, evitar llevar perros pola gran cantidá de xente y recuerden que nun se van consentir actitúes machistes, racistes, LGTBIfóbiques nin nengún otru comportamientu discriminatoriu.