Avérase’l branu y dellos de los festivales con más sonadía d’Asturies van anunciando les feches de les sos ediciones pa esti 2026. Nestos últimos díes hubo cinco confirmaciones nel calendariu: Xornaes Músico/Culturales de Xixón, Llaciniegu, Una Señora Fiesta, Regodón y Folixa la Sidre de Ribeseya.
Les Xornaes Músico/Culturales qu’entama la Banda Gaites Conceyu Xixón celébrense los díes 3 y 4 de xunetu y, anque entá nun se conoz la programación, nella la música tradicional va ser la protagonista. D’otra banda, el pueblu llaniscu de Porrúa acueye’l 4 de xunetu Llaciniegu, eventu nel qu’actúen la bandina de Llacín, GE L’Oriente, L.lariega, Abéu y Los Vicentos.
Pa rematar xunetu, los díes 17 y 18 celébrase Una Señora Fiesta na llocalidá piloñesa de Vegarrionda, cola particularidá de qu’esti añu nun va haber entraes pal festival nin zona d’acampada, pero sí vuelve’l Filandón, alcuentru de narración oral con cuentos, pallabres, hestories, música, baille… que va celebrase’l vienres 17. La programación del día 18 ta entá por confirmar.
El Regodón de Llaviana, festival venceyáu al Descensu Folklóricu del Nalón, va celebrar una edición nueva del 20 al 23 d’agostu; y, yá na seronda, Ribeseya acueye la Folixa la Sidre qu’organiza Entaína Ribeseya del 1 al 4 d’ochobre. Con estes anuncies, la escena musical asturiana sigue xorreciendo en directo.
Semeya: Una Señora Fiesta
Suscríbite a les nuestres novedaes
