Llanes, Xixón y Siero van ser l’epicentru de la música asturiana esti fin de selmana. El conceyu oriental acueye La X.O.T.A., Xira L’Oriente Trad Alcuentru, un festival de música y baille que, inspiráu na tradición oral, va axuntar les actuaciones de 6 Riales, Pandereteros d’Anguaño, Grupu Etnográficu l’Oriente, Andecha Folclor d’Uviéu y Draque, amás d’otres propuestes gallegues, cántabres y portugueses. Per otru llau, ente otres actividaes, Xixón concentra diez conciertos de varies programaciones, mentes qu’en Samartino (Siero) celébrase’l mercáu tradicional nel que toquen Ún de Grao y Anabel Santiago el domingu.
El Grupu Etnográficu L’Oriente de la Asociación Cultural Llacín, xunto al Ayuntamientu de Llanes y cola collaboración de la Conseyería de Cultura, Política Llingüística y Deporte son los responsables de La X.O.T.A. El vienres 7 a les 19h entama la programación en Porrúa con un homenaxe a informantes de la zona y un conciertu del tríu femenín de percusión 6 Riales. Llueu va haber escenariu abiertu pa rematar la nueche siguiendo col baille tradicional. El día gordu va ser el sábadu 8. A les 11.30h na villa de Llanes con un taller d’iniciación al baille gallegu impartíu por Miguel Sotelo. De tarde, dende les 16.30h, en La Portiella de Llanes van actuar Pandereteros d’Anguaño y les agrupaciones folclóriques l’Andecha Folclor d’Uviéu, Asociación Cultural O Fiadeiro de Vigo y Grupu Etnográficu L’Oriente de Llanes. La xornada continúa colo que la organización presenta como «baille con artistas coñocíos del panorama musical del folk asturianu» y remata colos conciertos de Draque, el dúu cántabru Casapalma y Omiri de Portugal, apostando asina por formaciones foriates qu’entemecen tradición y electrónica.
Xixón siguen calteniendo’l so papel de ciudá motor de la música asturiana en vivo gracies a diez actuaciones. Xaime Arias y Carlos Casado van presentar el llibru 10 canciones asturianes pa gaita y pianu el vienres 7 a les 17.30h nel salón d’actos del Conservatoriu Profesional de Música y Danza de Xixón. A les 18.30h, el Paséu de Begoña acueye’l X Alcuentru Infantil Magüeta, nel que van participar les formaciones gaiteres formaes pola reciella BGI Enxambre (Navia), Bandina infantil Villa de Xixón, sección moza EMT Villa de Xixón y la BGI Magüeta. Tamién continúen los I Encuentros Corales de Fátima nos que’l vienres van cantar la Coral Asturiana de Gijón y l’Orfeón San Lorenzo y el sábadu el Coro Más Que Jazz. Dambes actuaciones son a les 20h na Ilesia de Fátima. L’axenda xixonesa remata’l sábadu 8: a les 12h Fabes de Mayo presenten el so discu nuevu, Dayuri, en La Münster; y a les 13h en Cabueñes va actuar Ferla Megía na xornada de puertes abiertes d’El Palacio, l’espaciu destináu a residencies artístiques y acción cultural de la villa.
Los eventos de música’l país complétense col conciertu de Vero Rubio na Factoría Cultural d’Avilés, el vienres 7 a les 20h; y de Pipo Prendes en Grullos (Candamu), el sábadu a les 21.30h. Amás, nel Mercáu Tradicional de Samartino, nel conceyu Siero, va haber una pareya de gaita y tambor el sábadu 8 de de 13h a 15h y el domingu 9 actúa Ún de Grao a la hora’l vermú y Anabel Santiago dende les 16.30h.
Alcuentru d’Indstrumentos de Caña
Per otru llau, el Conceyu de la Gaita entama esti domingu 9 de xunu, a les doce la mañana, na Casa de Cultura de Noreña, el I Alcuentru d’Instrumentos de Caña. Trátase d’una serie de cinco ponencies -de Pelayo Fernandez; Miguel Ángel Fernández; Juan A. Ferriol y John Falcone; y Chus Solis-, de 15 minutos de duración sobre les característiques del material de la caña -l’Arundo Donax- y el comportamientu y axuste de la mesma nos instrumentos. Va empobinales Luis Pola, Doctor en Musicoloxía y representante del Conceyu de la Gaita como miembru de la so Xunta Directiva.
Na semeya 6 Riales, que van actuar en La X.O.T.A.
Suscríbite a les nuestres novedaes
