Divertia yá fizo pública la programación de les fiestes de Xixón, la Semanona, y la música n’asturianu y fecha n’Asturies va tar presente. Dempués de que l’añu pasáu el gobiernu saliente (FSA-IU) nun programara nengún conciertu n’asturianu nel escenariu principal; de les polémiques declaraciones de la ex conceyala de Festexos de Vox, Sara Álvarez Rouco y del actual presidente de Divertia, Óliver Suárez (ex Vox); y de la respuesta qu’hubo per parte del sector musical y cultural; esti branu van vese avances en dalgunos de los compromisos alquirios na moción qu’aprobó’l plenu del Ayuntamientu de Xixón por mayoría absoluta l’agostu pasáu.
D’esta manera, la música n’asturianu va volver a sonar nel escenariu principal de la Semanona -l’asitiáu xunto a la llamada playa de Poniente– con dos conciertos: Rodrigo Cuevas y Hevia. L’axitador folclóricu toca per tercer añu nes fiestes de Xixón y esta vegada va presentar La Romería el domingu 4 d’agostu a les 23h. Per otru llau, Hevia torna’l martes 6 a Poniente -el so últimu conciertu nesti espaciu foi en 2008- col espectáculu Busindree Reel. Nél va festexar el 25 aniversariu de la concesión del Multiplatinum Europe Awards, -distinción que se-y da a los artistes que vendieron más d’un millón de discos n’Europa-, con un conciertu mui especial y enllenu de collaboraciones.
Amás d’estes dos actuaciones principales, la cultura tradicional va tar bien presente en cites qu’acueye tolos años la Semanona y los sos díes previos. Asina ye como’l 20 de xunetu va haber el Festivalín Escuelas Grupos Folclóricos de Xixón; del 31 de xunetu al 2 d’agostu van actuar Los Xustos, Trebeyu y Coros y Danzas Jovellanos dientro del Festival Folclórico Internacional; el 3 d’agostu les agrupaciones folclóriques de la ciudá participen nel pregón col qu’entamen les fiestes y la Banda Gaites Castrillón y la de Villa de Xixón toquen nel XXIII Festival Internacional de Bandes de Gaites Villa de Xixón; y el domingu 4 van participar 18 agrupaciones nel Desfile tradicional del día d’Asturies en Xixón.
La programación presentada por Divertia destaca tamién pola programación de más artistes d’Asturies -anque nun canten n’asturianu- nos escenarios de la Plaza Mayor y de Poniente. Asina ye como tamién van tocar Ilegales, Enol, Australian Blonde, Tigre y Diamante, Querita Margot, Me Fritos and Gimme Cheetos, Mina Longo y José Manuel Iglesias. Dientro de les cites festives tamién destaca la vuelta del festival Arcu Atlánticu, del que pel momentu ta confirmáu el conciertu de Nuberu nel Muséu del Pueblu d’Asturies en representación de la música’l país.
Un procesu cultural y políticu
Con esta programación, Xixón vuelve a situase pel momentu como’l conceyu que más música asturiana programa nos sos eventos festivos; daqué que nun ye normal ver nes distintes programaciones festives del branu asturianu. Too ello tien especial valir dempués del conflictu vivíu l’añu pasáu coles intenciones de querer vetar a la música n’asturianu na ciudá y la respuesta qu’hubo per parte del sector cultural presentando la moción en defensa y promoción de la música y cultura n’asturianu en Gijón/Xixón, especialmente nos eventos festivos, educativos, deportivos y culturales, qu’aprobaron tolos partíos políticos menos Vox.
Llueu d’esto, IX-Convocatoria por Asturies solicitó énte’l plenu la reprobación del presidente de Divertia, Óliver Suárez por otres polémiques declaraciones contra la cultura n’asturianu y, nesi plenu, Xosé Antón Ambás participó con un emotivu discursu en representación de l’Asociación Grana n’Alcordanza de Yolanda Huergo y como firmante del manifiestu Música n’asturianu SÍ. Sicasí, la reprobación nun salió alantre al nun apoyala l’equipu de gobiernu.
L’últimu capítulu d’esti procesu vieno’l pasáu mes de marzu de la mano d’un ruegu presentáu pola conceyala d’IX-Convocatoria por Asturies. Noelia Ordieres, nel que pidía más presencia de la música asturiana na Semanona, en llinia cola moción aprobada. El resultáu avanza na llinia deseada; sicasí, Ordieres sorrayó que-yos gustaría «un programa con más grupos n’asturianu».
Suscríbite a les nuestres novedaes
