Les Pites entamen una nueche en danza en Lata de Zinc
El chigre cultural Lata de Zinc d’Uviéu acueye’l vienres 20 de xineru a les 22.30h una nueche en danza, la Nueche en Lata, organizada pol grupu Les Pites. L’eventu preséntase como una «folixa de baille tradifantasía» abierta pa quien quiera baillar o xubir a tocar col so instrumentu, al estilu de los vermús en danza que vienen faciendo dende va tiempu n’esti y otros llocales de la ciudá.
L’oxetivu de Les Pites Ensin Gallu «ye crear un espaciu seguru nel que tol mundu pueda baillar, independientemente d’onde venga». Pue acudise en «compañía o individualmente, sabiendo baillar muncho, poco o un res». Trátase d’un entornu abiertu nel que lo importante ye l’aceptación y afayase pa pasalo bien. Dende Les Pites esclarien que «nun se van tolerar comportamientos machistes nin lgtbifóbicos» y agradecen a Lata de Zinc «ufiertar un llugar diversu onde’l techno, el metal o l’indie nun tán reñíos col tradi».
