L-R asoleyen el videoclip de “Sete Trompetas”

El dúu de post-folk L-R, formado por Leticia Baselgas (voz y percusión tradicional) y Rubén Bada (guitarres y coros) asoleyó ayeri’l videoclip del tema “Sete Trompetas”, del so discu N.O.S (2021). Esti cantar ye, tal como ellos presenten, «una canción pal bail.le al estilu de las muliñeiras del suroccidente d’Asturies».

La novedá nesti casu vien pola dirección del videu. Nos cinco videos anteriores foi la propia Leticia quien s’encargó d’ello, marcando l’estilu post-folk non namás no musical, sinón tamién no visual, amestando imáxenes propies, efectos y material d’archivu pa da-yos el calter deseyáu y crear unes sinerxes propies. Esta vegada confiaron el llabor a Titi Muñoz, reconocíu realizador asturianu de llarga trayectoria nel mundu audiovisual, con trabayos fechos pa Desakato, Misiva, Ilegales, Avalanch y otres bandes de la escena asturiana y estatal.

El resultáu ye un videoclip qu’entemez lo performativo colo conceptual. Nun presenta una narración esplícita, pero nes imáxenes sí se pue intuir una confrontación ente un escenariu natural y calmáu y otru industrial y de calter apocalípticu, que ye’l que predomina. El tono azafranáu y les referencies constantes al fueu terminen por conectar la temática cola percusión enérxica y la distorsión post-folk de les guitarres. «Dende la cocina de casa», abriendo camín y definiendo nuevos estilos na música asturiana».

Merca discos de L-R na tienda online y siéntilos nes plataformes dixitales

Dexa un comentariu

X