«Ta dedicáu a una bona amiga que nos dexó demasiao pronto pero diónos una llección de cómo encarar esos momentos»
Esti domingu 12 de payares a les 19h tien llugar nel Teatru La Llaboral de Xixón la gala final del XV Premiu Camaretá al Meyor Cantar, l’únicu premiu institucional qu’existe anguaño pa da-y reconocimientu a la música fecha n’asturianu o gallego-asturianu. Marisa Valle Roso con “Tonada“, José Manuel Tejedor con “Les tos nales“, Vero Rubio con “Dixo miou padre“ y Alienda con “Zanca de cabra“, son los cuatro grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.
Siguimos el cuestionariu con José Manuel Tejedor, ún de los gaiteros más gallardonaos del panorama asturianu, con tres premios Macallan del festival de Lorient, un Premiu Nacional de la Música y dellos premios AMAS. Fixo abondes actuaciones en festivales intercélticos de toa Europa, foi teloneru d’artistes como Van Morrison y Sinead O’Connor y collaboró colos nomes más destacaos del folk internacional. Esta canción pertenez al últimu trabayu, Lluz, tien lletra de Gema Fernández y pon-y voz Loreto Suárez d’Algaire.
¿Qué supón pa ti la nominación nesti premiu y qué supondría ganalu?
Ye prestosu que reconozan el to trabayu y, nesti casu, d’un grupu ampliu de persones que tán implicaes nesti proyectu. Por eso, paeceríame un gran pagu pa toos el ganar esti premiu.
¿Por qué escoyisti esti cantar pa concursar?
Tien un gran significáu pa mi. Ta dedicáu a una bona amiga que nos dexó demasiao pronto, pero de la mesma, diónos una llección de cómo encarar esos momentos na vida; d’eso fala esti cantar.
¿Tenéis daqué especial preparao pa l’actuación del domingu?
Si, voi contar con dalgún collaborador especial, pero nun quiero desvelar enforma
