«Ye un cantar especial tanto pola temática d’empoderar a la muyer, como pola variante na que ta cantáu»

Mañana domingu 12 de payares a les 19h tien llugar nel Teatru La Llaboral de Xixón la gala final del XV Premiu Camaretá al Meyor Cantar, l’únicu premiu institucional qu’existe anguaño pa da-y reconocimientu a la música fecha n’asturianu o gallego-asturianu. Marisa Valle Roso con “Tonada“, José Manuel Tejedor con “Les tos nales“, Vero Rubio con “Dixo miou padre“ y Alienda con “Zanca de cabra“, son los cuatro grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.

Zarramos el cuestionariu con Alienda, grupu de power folk, xéneru qu’amiesta música y instrumentos tradicionales asturianos con elementos d’otros estilos. Tienen grabáu l’EP Alendando (2014); y Alienda (2023), el so primer discu de duración llarga del que “Zanca de cabra” salió como adelantu nel 2022 y que tien lletra del escritor Roberto González-Quevedo.

¿Qué supón pa vos la nominación nesti premiu y qué supondría ganalu?

Pa nós ye un arguyu’l poder tar nominaos, yá que ye’l másimu reconocimientu pa la música fecha n’asturianu. Amás pa nós, un grupu que facemos música n’asturianu y que defendemos la cultura y la nuesa llingua, ye daqué que non solo mos presta sinón que mos da aliendu pa siguir trabayando y amuésanos que la música n’asturianu presta y ye viable y que la llingua nun ye nenguna barrera, tolo contrario, ye una riqueza cultural por esplotar con munchu futuru y posibilidaes.

¿Por qué escoyistis esti cantar pa concursar?

Zanca de cabra ye un tema que consideramos mui representativu del grupu y de lo que queremos tresmitir. Paeznos qu’esti cantar tien un mensaxe con muncha fuercia y sentimientu. Trata sobre momentos vitales importantes d’una muyer peculiar y fuerte, cuntándolos con un aquel mui especial. La melodía principal y la primer estrofa foron recoyíes d’Eva González, una de les escritores y tresmisores más importantes p’Asturies, por Roberto González-Quevedo, quien amás d’eso, escribió pa nós el restu de la lletra y que siempres completa la nuesa música coles pallabres más guapes, como fixo yá en varios de los nuesos temes. Bárbara, la nuesa vigulinera y cantante nesti tema, ye la nieta d’Eva y fía de Roberto; lo qu’añade más sentimientu a la Zanca de cabra. Tou esto fai qu’esti tema seya mui especial pa nós y paeciónos una opción mui bona pa presentar a esti Premiu Camaretá que tanto mos presta.

¿Tenéis daqué especial preparao pa l’actuación del domingu?

L’actuación en sí va ser especial. Puede que tengamos dalguna sorpresina guardao, pero lo que prima ye la canción. Paeznos que’l tema ye especial abondo en sí mesmu, tanto pola temática del cantar, la muyer y el so papel que tratamos d’empoderar y reconocer, como pola variante na que ta cantáu, qu’amuesa esi tesoru cultural que tenemos, que ye la riqueza léxica. Amás esti tema tien un aquel mui personal y emotivu pa nós.

Sienti “Zanca de cabra” d’Alienda

Mercar discu d’Alienda