La música asturiana va sonar nel VESU. Esti festival de música independiente ta acabante d’anunciar un conciertu como actividá paralela a la programación principal del eventu. Trátase d’una actuación de Leticia Baselgas en solitario que, tres d’estrenar el so proyectu musical personal el pasáu ochobre en Tabacalera (Cimavilla), vuelve a ponese delantre un micro ensin compañía de más músicos. Amás, va ser nun formatu bien especial: ye embaxo un horru en Güeñu (La Ribera), l’aforu ta llendáu a namás 40 persones y pon el ramu a una actividá que ta precedida por una visita guiada pelos horros d’esta llocalidá. La cita ye’l vienres 21 de xunu dende les 17.30h -la visita dura hora y media y el conciertu trenta minutos-, tien un preciu de 15 € y naz d’una collaboración ente VESU, Puru Remangu y l’Asociación del Horreo Asturiano. Yá tán a la venta les entraes pa esti orixinal alcuentru cola cultura y el patrimoniu del país.
Suscríbite a les nuestres novedaes
