Lletres Asturianes inclúi un artículu d’Héctor Braga sobre la escritura de l’asturianada
Una entrega nueva del boletín oficial de l’Academia de la Llingua yá ta disponible on line, con esti volume, Lletres Asturianes, llega yá al númberu 129. Ente los trabayos publicaos, rescampla ún firmáu pol musicólogu Héctor Braga, tituláu «Carauterístiques de la escritura de la canción tradicional asturiana». Nesti testu fálase de la oralidá de la música asturiana, de la lliteratura oral venceyada a la espresión musical, de les característiques llingüístiques de los rexistros musicales, de la dificultá d’investigar l’orixe de la canción asturiana o de les primeres muestres d’escritura musical (partitures) de la mesma. Trátase d’un artículu fondu y mui interesante d’un home que conoz perbién la materia y sabe tresmitila con xeitu, axuntando al mesmu tiempu rigorosidá y divulgación.
Nel resume qu’antecede al artículu propiamente dicho coméntase que de la lliteratura escrita n’asturianu hai una cronoloxía granible que contrasta cola probetaya conocencia del usu musical que se fai d’esta llingua, productu d’una escasa documentación medieval y d’una oralidá na tresmisión musical qu’entá prevalez anguaño. Yá nel testu, esprésense idees como que «pola mor del so raigón na memoria coleutiva, les asturianaes qu’anguaño s’atalanten tradicionales falen de temes cotidianos como’l trabayu, el mediu físicu o la naturaleza, afondando en cuestiones significatives como l’amor, la denuncia social, l’amistá y el patriotismu nuna secuencia bien conocida nel estudiu antropolóxicu del pueblu asturianu. Camiéntase qu’esta falta d’escritura respuende a que nuna parte de la sociedá hai la creencia común —y non namás n’Asturies— de que la música popular tradicional ye una música culta marafundiada nes manes del pueblu inorante y analfabetu que nunca nun la supo escribir».
Héctor Braga ye un músicu, cantante y multiinstrumentista perbién conocíu n’Asturies, amás de musicólogu y investigador de la canción tradicional del país; esti añu foi’l ganador del XXIX Premiu «Máximo Fuertes Acevedo» d’Ensayu, que convoca la Viceconseyería de Cultura, Política Llingüística y Deporte del Gobiernu d’Asturies, cola obra titulada Nel cantu la memoria. Ensayu sobro l’asturianada tradicional, que va publicase nos próximos meses.
L’artículu pue descargase llibremente nesti enllaz:
https://lletresasturianes.alladixital.org/pdf/1698755053Carauter%C3%ADstiques%20de%20la%20escritura%20na%20canci%C3%B3n%20tradicional%20asturiana%20-%20H%C3%A9ctor%20Braga%20Corral.pdf
