Llevólu’l Sumiciu llanza ‘Entaína’, el so primer EP
El dúu de música electrónica asturiana Llevólu’l Sumiciu ta acabantes d’asoleyar el so primer EP, ‘Entaína‘. Depués de presentar dende finales del 2020 los singles “Saldiguera“, “Muncho Quixera Tener” y “Salir Moces a Bail.lar“, los dos hermanos que dan forma a esti proyectu llancen agora seis cantares que, como ellos mesmos dicen, «restolen pente la música y lo visual, pente l‘Asturies natal y el Caribe, pente‘l pasáu y el futuru».
El sellu berlinés Samaín Music -especializáu n’adaptar la tradición musical de la Península Ibérica a los instrumentos nuevos y a les corrientes estétiques modernes-, ye l’encargáu d’editar esti EP dixital que presenten asina na fueya promocional: «El Sumiciu ye un duende de la mitoloxía astur, venceyáu a travesures como la desaparición d’oxetos pa incordiar a los sos dueños, siendo habitual sentir la espresión “llevólu’l Sumiciu”. El duu garra esa espresión como nome y esa actitú como métodu pa crear el so primer EP, un conxuntu de seis cantares qu‘atropen melodíes y ritmos de la tradición asturiana pa mecelos cola música más contemporánea».
Con ‘Entaína‘, la música asturiana renuévase y cantares de formaciones como Nuberu, D’Urria, Xaréu Folk o Grupu Trasgu suenen más actuales y mestizos gracies a la revisión que faen d’ellos Llevólu’l Sumiciu fusionándolos con ritmos afrollatinos y electrónicos.
