Llevólu’l Sumiciu y Ferla Megia asoleyen temes nuevos

Dos de los nomes más innovadores de la escena musical asturiana, Llevólu’l Sumiciu y Ferla Megia, asoleyaron estos últimos díes nueves canciones nes plataformes dixitales. El dúu d’electrónica de raigañu Llevólu’l Sumiciu publicó «Ronzón«, un potente tema que vienen interpretando nos sos directos, al que-y pon voz Neurora y que ve la lluz dientro del compilatoriu Codex Futura de Samain Music. Per otru llau Ferla Megia llanza «La vida se gasta / Pastora«, una pieza en castellanu y n’asturianu qu’entemez pop y folk y inclúi un sampléu estrayíu d’una muyer de Bode (Parres). Estos dos cantares amuesen la renovación que se ta dando dientro de la música n’asturianu poles xeneraciones más nueves.