Maqueta de Mal de Güeyu / Mal de Ojo (1992-1994)

El documentu sonoru qu’asoleyamos agora nel AMCA trátase de la maqueta que grabaron Mal de Güeyu / Mal de Ojo, formación afincada n’Uviéu que tuvo n’activo ente 1992 y 1994. Na única grabación que ficieron apaez una muestra del so repertoriu: siete temes variaos estilística y llingüísticamente.

Na segunda metada de los años 80 y primera de los 90 echa a andar una xeneración nueva de bandes de folk, con nomes como Balandrán o Cambaral, qu’anoven el soníu d’esta escena incorporando a la so instrumentación la electricidá y acoyendo na so música otres influyencies (rock, pop, jazz, etc.). Esi tiempu ye tamién el del surdimientu del rock n’asturianu, que se facía realidá con formaciones como Dixebra o Los Berrones, escomenzando a facelo mui popular. Yeren años de fervencia musical y de munchu dinamismu na escena del país, nos que los grupos surdíen con facilidá y la ufierta diversificábase. Dellos son anguaño nomes importantes, otros pasaron yá a la historia pero dexaron una buelga, sicasí, hebo tamién munches bandes efímeres o de vida curtia que cayeron nel escaezu.

Una d’estes últimes foi Mal de Güeyu/Mal de Ojo (emplegaron los dos nomes), con componentes de varios llugares pero afincada n’Uviéu, que taría n’activo namás dos años (1992-1994); la so propuesta sonora bebía del rock, el pop, el folk y la tradición asturiana, cantando n’asturianu, castellanu y inglés. D’esta formación facíen parte cino músicos conocíos de la escena asturiana del momentu: Antoine Wingger (voz), Marcos Maoxo (violín), Ramón González Morán (teclaos), Joaquín D. Méndez (guitarra) y José Manuel Fernández «Guti» (gaita). Dieron non munchos conciertos, ente los que destaca l’ufiertáu nes fiestes de La Puela (Ayande) xunto a Dixebra. La maqueta qu’agora dixitalizamos y presentamos foi la única grabación que fixeron, na qu’apaez una muestra del so repertoriu: siete temes variaos estilística y llingüísticamente. Los cortes son estos:

  1. Tal vez.
  2. El funcionariu.
  3. Salir moces.
  4. Taladriz.
  5. Ponteo
  6. Cuan-tu-fríu-fai.
  7. Ensin títulu

// CALCA EQUÍ PA SENTIR LA MAQUETA DE MAL DE GÜEYU / MAL DE OJO //

Dexa un comentariu

X