Mayu entama enllenu d’eventos y llanzamientos

La música asturiana nun apara. Pa esti mes de mayu yá hai anunciaos más d’una ventena d’eventos ente los que s’alcuentren conciertos, proyecciones, charres, festivales y presentaciones de discos. Amás, tán confirmaos tres llanzamientos discográficos: los singles «Valiente» d’Héctor Braga y «Santolaya» d’El Velcro xunto a Alicia Villanueva y el segundu discu del gaiteru Rubén Alba, Secretos sin contar. Munches de les actividaes concéntrense nesti fin de selmana.

L’axenda d’eventos entama esti xueves 2 con dos proyecciones. A les 18h en Club de Prensa La Nueva España, n’Uviéu, acueye’l preestrenu de «Valiente», el segundu single qu’Héctor Braga adelanta del so próximu trabayu. Tres la bona acoyida del primer preestrenu, el multiinstrumentista va falar sobre esti cantar -el primeru que dedica a una temática tan popular como la guerra del 36-37 y la mina- pa ello va tar acompañáu de los directores y de dellos recreadores históricos uniformaos, ente los que s’alcuentru un sobrinu-nietu d’Aida de la Fuente. Otra proyección completa la xornada; la del documental Lluz d’agostu en Xixón. Tres los pasos de Nacho Vegas, qu’acueye’l Teatru Prendes de Candás a les 20h.

El vienres 3, Día de les Lletres Asturianes, hai seis cites cola música’l país marcaes por esta celebración. A les 18h Vero Rubio toca na Casa la Cultura de L.luarca; a les 19h Héctor Braga estrena’l so espectáculu Rabil dientro del actu qu’entama l’Academia de la Llingua Asturiana nel Teatru Campoamor d’Uviéu; y a les 19.30h 6 Riales actúen na Capiya Los Dolores de Grau. Yá entrada la nueche, Calea toquen a les 21h nel Recintu Ferial de Santa Teresa de Tinéu y Les Pites entamen a les 22h una Nueche en Lletres na que baillar asturiano en Lata de Zinc. Amás, a les 20.30h El Velcro estrena’l so videoclip nuevu, «Santolaya», nel CSA L’Apiaderu de Nava, nun actu en que van tar acompañaos d’Alicia Villanueva, collaboradora nesti cantar, del director Iván de Degaña y nel que tamién actúa Tasio. L’últimu de los conciertos ye’l de Misiva nel festival llaniscu Vidiago Rock.

El sábadu 4 a les doce’l mediudía n’Uviéu ye la manifestación pola oficialidá qu’entama la Xunta Pola Defensa de la Llingua Asturiana. N’acabando, Alicia Álvarez, Ún de Grao y Fruela 757 van xubir a interpretar dellos de los temes nun escenariu asitiáu na Plaza la Escandalera. A esa hora entama tamién en Bárzana el XX Mercáu Quirosán, qu’a lo llargo’l fin de selmana acueye les actuaciones de La Garrapiella, Skama la Rede y Los Gascones, amás del VII Alcuentru de Bandes de Gaites nel que van participar la Xordia, LaKadarma, Candás y Teixo-Manolo Quirós. Otru festival, el Válgame Fest, entama tamién los actos de la so tercera edición, acoyendo la charra de Fe Santoveña Elementos de conformación de la identidad cabraliega y la esposición Cabrales a vista de pájaro.

Música celta

Les demás cites pal sábadu 4 tán protagonizaes pola música de calter atlánticu. A les 18.30h actúa la Orquesta Céltica Asturiana nel Espaciu de Creación Mozo de Salas; a les 19h el Parque Cuno Corquera de Posada (Llanera) acueye’l Conciertu les Lletres nel que van tocar La Madreña y Llan de Cubel y a les 22h la formación astur-bretona La Banda… LATIRA! toca nel Auditoriu de Tapia. Amás, Rubén Alba estrena’l so segundu trabayu discográficu con un conciertu perespecial na Casa la Cultura d’Avilés que va cuntar con collaboraciones sorpresa. Pa rematar, el domingu continúa en la celebración del XII Concursu de Canción Asturiana Conceyu de Siero. Na Axenda de musicasturiana.com pue vese información d’estos y más eventos que van facese esti mes.