Tres la desapaición de la banda avilesina Balandrán (1987-2001), una de les sos fundadores, Tina Cuadriello, y ún de los componentes de la última formación, Ramón G. Morán, diben entamar un nuevu proyectu musical. Asina, surde Batulax —n’activo ente 2001 y 2005—, que sigue col mesmu espíritu renovador, con un soníu mestizu acústico-llétricu y descaradamente contemporáneos. Nun contestu musical como l’asturianu d’aquel tiempu, nel que primaba’l soníu acústicu dafechu, ellos empobinen hacia un folk-rock de base funk, que diba convertilos nuna islla naquella escena.
Con estes premises grabaríen una maqueta nel añu 2003 que suena realmente bien, na qu’inclúin seis pieces entre la tradición, la reellaboración y la composición. Sobre una base rítmica funki, discurren unes melodíes onde l’acordion ye’l protagonista, aportando les voces tanto’l timbre femenín como’l masculín. Tres de los cortes son tradicionales, con arreglos realmente novedosos y mui orixinales, mientres qu’otros tres son de composición propia, rescamplando d’estos últimos el tituláu «Fondos marinos», de temática ecoloxista. Foi esta maqueta la única muestra del trabayu d’una banda que, ensin dulda, ameritaba muncha mayor proyección y suerte.
Suscríbite a les nuestres novedaes
