Mieres festexa la Folixa na Primavera esti fin de selmana

Como cada añu Mieres enllénase de cultura’l país cola Folixa na Primavera. Del 19 al 21 d’abril va haber baille tradicional, gaita, electrónica de raigañu, folk, tarde en danza y conciertos nel Parque Xovellanos y nel de La Mayacina, en Requexu, na Casa la Cultura y peles cais de Mieres del Camín. Too ello va tar acompañao d’otres actividaes pa un públicu de toles edaes nes que la sidra, la gastronomía y la cultura’l país son el puntu d’alcuentru.

Como cada añu, L’Entamu que sigue al pregón marca l’aniciu de les actividaes musicales el vienres 19. La Banda Gaites Villa de Mieres y les agrupaciones folclóriques llocales L’Artusu, Prau Llerón y Ruxidera van xubir al escenariu del Parque Xovellanos a les 21.30h. Llueu llega’l turnu de la electrónica de raigañu cola actuación de Llevólu’l Sumiciu a les 23.15h, mientres que Mondra va aportar dende Galicia per primer vez a Asturies pa presentar el so discu ARDÉN qu’entemez folk gallegu, pop y soníos de la música urbana, con una propuesta estética mui trabayada.

Pal sábadu 20 la programación entama a les once la mañana col Taller de gaites del mundu que va dar na Casa la Cultura el músicu Fernando Mosquera de Mosquera Celtic Band. Mentanto, el Parque La Mayacina va acoyer de 12h a 14h l’espectáculu musical folk Pim, Pam, Fuera. Carabín Carabán. Les actividaes de pela mañana rematen a les 13.30h colos desfiles y pasucáis de L’Artusu, Ruxidera, Prau Llerón, Gaites Villa de Mieres y Banda Música de Mieres. El son y el baille sigue a les 20h con una Tarde en Danza amenizada por Los Gascones y los conciertos de les formaciones foriates Mosquera Celtic Band a les 23h y d‘Uncle Bard & The Dirty Bastads a les 00.45h.

Estrenu de Poema Sinfónicu

Pal mediudía del domingu 21 tien llugar nel Parque Xovellanos l’estrenu del poema sinfónicu 13 Reyes, dirixíu por Iñaki Santianes y nel que s’axunten la Banda Gaites La Laguna del Torollu y la Banda de Música de Mieres. Per otru llau, l’actividá musical zárrales a les 12,30h ente la Plaza Requexu y la cai Jerónimo Ibrán; ellí va haber cantares de chigre, tonada y gaita con Iván Rionda (gaiteru) y les y los cantadores Manuel Roza Llera, Liliana Castañón, Álvaro Fernández Conde y Cristina Sánchez. Toles actividaes son de baldre y hai serviciu de buses curuxa ente delles poblaciones del conceyu.

Dexa un comentariu

X