Nacho Vegas (Xixón, 1974) ye ún de los cantautores con más renome d’Asturies. A lo llargo d’una trayectoria de más de trenta años siempre amosó’l so compromisu cola llingua asturiana y nesta playlist compilamos dalgunes de les pieces que’l xixonés interpreta dafechu nesti idioma y que s’amesten a otres que tienen fragmentos n’asturianu.
Esti llistáu de 16 cantares inclúi temes de la so carrera en solitario, collaboraciones y tamién d’otros proyectos musicales nos que participó como Diariu, fechu a medies col músicu, escritor y realizador audiovisual Ramón Lluis Bande, y col qu’asoleyó dos discos en 1997 y 1999; o Lucas 15, formación cola qu’en 2007 publicó un discu de sonadía xunto a Xel Pereda (Llan de Cubel, Felpeyu) nel que reellaboraron temes del cancioneru popular asturianu dende una perspectiva de rock alternativu.
Gracies a estos cantares y proyectos, a declaraciones públiques en defensa del asturianu, y a participar n’eventos como’l Conciertu Pola Oficialidá, Nacho Vegas ye ún de los nomes de la música fecha n’Asturies que, anque componga mayoritariamente en castellanu, visibiliza la realidá del idioma autóctonu fuera de les fronteres asturianes.
Con esta publicación continuamos la estaya de playlists nel nuestru perfil de Spotify. Inspirándonos nes This Is: que la plataforma musical sueca dedica a artistes de renome, Musicasturiana.com facemos lo propio centrándonos nos cantares de los grupos más destacaos de la música’l país. Esto ye: Dixebra, Esto ye: Llan de Cubel, Esto ye: Mariluz Cristóbal Caunedo, Esto ye: Nuberu y Esto ye: Muyeres foron les anteriores incorporaciones. La escoyeta musical d’estes playlists nun respuenden namás a criterios algorítmicos o a los temes más populares de cada formación.
Suscríbite a les nuestres novedaes
