Esta selmana presentóse n’Instagram Cueru y Palu, una cuenta nueva dedicada al tambor tradicional asturianu. Ye la primer iniciativa d’esti calter que naz y nella van publicase «semeyes vieyes , videos, exercicios de tambor y caxa, etc.». Too ello col oxetivu de «da-y más visibilidá al tambor tradicional asturianu y ufrir conteníos estremaos que dean a conocer esti instrumentu y sobre manera música asturiana», desplica’l responsable d’esti perfil, que pel momentu prefier caltener el so anonimatu p’anuncialo nun futuru.
«Hai munchos concursos de gaiteru solista y mui pocos de pareya de gaita y tambor; siempre queda’l tambor a la solombra, anque seya un instrumentu d’acompañamientu, mayormente de la gaita, tamién tien más que dicir y más qu’ufrir», critica l’autor de Cueru y Palu, que col so llabor nagua por da-y más repercusión a esti instrumentu, asina como a les caxes y demás percusión qu’acompañen a les gaites.
El responsable d’esta cuenta d’Instagram tamién llamenta la situación na qu’anguaño s’alcuentra esti instrumentu de percusión tradicional: «vese como un instrumentu de fondu pa meter ruíu y nun ye asina; poca xente sabe tocar realmente’l tambor como se debería, cualquiera cueye les baquetes y fai un ritmu y piensa que yá pue dir a una misa, a una boda o a una romería a tocar; y ye probable que cumpla, pero tocar el tambor perfectamente ye mui complicáu». Por eso Cueru y Palu ye agora una ferramienta nueva pa esparder «conteníu vistosu» per Instagram y facer por ameyorar la salú del instrumentu.
Suscríbite a les nuestres novedaes
