POP+TRAD ye una amuesa de los sones populares y tradicionales asturianos del sieglu XX nes grabaciones comerciales, un catálogu discográficu con un diseñu visual llamaderu qu’acueye una cuenta d’Instagram. El perfil lleva publicando referencies en redes sociales dende la seronda de 2024 y ta afitándose como una de les cuentes de divulgación más interesantes del panorama musical asturianu con más d’una ventena de referencies nes qu’especifica, amás de los intérpretes que toquen nes grabaciones, datos discográficos, el títulu de les pieces y, en dellos casos, una esbilla del audiu.
Una colección de discos bayurosa con dalguna rareza, delles referencies de gaiteros y tamboriteros poco conocíos, y qu’afondaba, por exemplu, nel repertoriu de Remis, foi l’entamu d’esti proyectu nun «momentu afayadizu pa empezar a pone-y orde a la colección, datar la información y compartila con otros coleccionistes o con tol que tuviere interesáu», como comenten dende POP+TRAD. Toles referencies asoleyaes anguaño son parte del so archivu personal, anque, nun descarta collaborar «con otros coleccionistes o entidaes que compartan l’enfotu del proyectu y el so calter públicu y desinteresáu».
Sobre l’oxetivu d’embarcase nesti xera, comenta que «nesta primer etapa namás se busca apurrir una referencia documental de les grabaciones comerciales que cunten con, polo menos, dalguna pieza de gaita o gaita y tambor, y que correspuendan a músicos clásicos. Tamién, al traviés de reels, amosar brevemente un exemplu de les grabaciones». Poro, el so llabor pue servir mesmo pa tola xente que-y preste la música popular y tradicional y que busque un catálogu visual; que pa «la xeneración o xeneraciones de gaiteros y tamboriteros más mozos, teniendo en cuenta que son les primeres xeneraciones que nun pudieron o nun van poder sentir munchos intérpretes clásicos en directo»; y «les xeneraciones anteriores d’intérpretes que busquen frañir el distanciamientu ente músicos clásicos y músicos modernos de les décades anteriores y quieran afondar nel estudiu de los primeros».
Anque’l llabor desendolcáu yá ye d’un valir bultable, POP+TRAD quier ufrir un catálogu más ampliu y públicu onde cualesquier persona pueda consultar la información y, ponela, tamién a disposición d’otres plataformes como Discogs. «La siguiente fase ye la de dixitalizar toles pieces grabaes pa guardar una copia dixital d’elles y quitar de que se pierdan les orixinales o s’estropien poles torgues de los formatos físicos. En función de les posibilidaes llegales -la mayor parte de les grabaciones tán descatalogaes- la idega ye tamién poder ufriles de manera desinteresada pa consulta y descarga», comenta. Anque nun descarta trescribir les pieces como un complementu didácticu al catálogu, destaca que, enantes de pensar nel futuru del proyectu, ye necesario «seguir atopando la financiación necesaria pa que la colección pueda siguir medrando».
Suscríbite a les nuestres novedaes
