El Grupu Folclóricu Prau Llerón cumplió anguaño 45 años puxando pol baille y la cultura tradicional del país. Los actos de celebración rematen esti sábadu 20, a les 19h, nel Auditoriu Teodoro Cuesta de Mieres, onde va estrenase Diarios d’Ampudia, una obra escrita y dirixida por Luis Ángel Fernández Santos qu’axunta baille y música tradicional, audiovisuales, teatru y historia y que ta dedicada a Aurelio de Llano y Roza de Ampudia, inxenieru, arqueólogu y consideráu por dalgunos como’l padre de la etnografía asturiana.
«La vida y obra d’esti folclorista míticu sírvenos pa dir percorriendo llugares estremaos d’Asturies y amosando diferentes bailles, cantares y tradiciones«, desplica’l director Luis Ángel Fernández Santos, al rodiu d’un espectáculu que ta «articuláu en nueve actos; nos que cada actu va tar precedíu d’una breve introducción fecha pol actor y monologuista Carlos Alba, que ye quien encarna a Aurelio del Llano». Darréu d’estes partes teatrales, aporta cada actu qu’amuesa la bayura de bailles, cantares y costumes que’l propiu Aurelio de Llano recoyó y documentó nel so trabayu, sobre manera na obra Del Folclore Asturiano. Mitos, leyendas y supersticiones, pegoyu nel que s’inspiró esti espectáculu.
Amás de los bailladores de Prau Llerón, Diarios d’Ampudia cunta cola participación de destacaos músicos: Satur Vega de Pandereteros d’Anguaño; Iván de Trubia de Picarós; Daniel Álvarez de Corquiéu y otra montonera proyectos musicales; el violinista Juanjo Marqués; Pablo Crespo al bombu; y les pandereteres de Prau Llerón ente les que s’alcuentren Loreto Suárez y Iratxe Espina -dambes componentes d’Algaire-, y Mari Carmen Santos -fundadora d’esta agrupación folclórica mierense-.
«Mientres l’actor ta falando, va haber unes imáxenes ilustratives de lo que vamos poder ver en cada actu», desplica Fernández Santos sobre la cuarta estaya del espectáculu. El responsable de facer estes pieces ye David AJ -componente de Llevólu’l Sumiciu– que propón «un viaxe audiovisual ambientáu na dómina de los años 20«. Juan Yagüe na producción musical, Loreto Suárez nel diseñu y Marco Castañón na parte técnica completen l’equipu d’una obra na que Prau Llerón lleva muncho tiempu trabayando, que cunta col sofitu del Conceyu Mieres y pal que l’estrenu d’esti sábadu tien entrada llibre hasta completar aforu. La intención de l’agrupación mierense ye poder representala en más espacios próximamente.
Suscríbite a les nuestres novedaes
