Vuelve Xaréu. Folixa Moza, festival entamáu pol Conseyu de la Mocedá del Principáu d’Asturies (CMPA) qu’esti añu festexa 40 años fomentando l’asociacionismu y la partipación ente la xente más mozo. Tres de la primer edición celebrada’l pasáu añu en La Benéfica de Piloña, esti añu l’escenariu van ser los Kuivi Almacenes d’Uviéu con una xornada gratuita pal 20 de xunu que va durar dende les 16.30h hasta les 2h y na que distintos estilos de música n’asturianu son los protagonistes.
El Xaréu entama a les 16.30h con olimpiaes de xuegos tradicionales pa dar pasu, de 18h a 19h, a un taller de pandereta que va poner el Grupu Folclóricu Prau Llerón de Mieres y a ún de DJ qu’imparte La Güeriata. De 19.30h a 20.30h Prau Llerón va dar otru cursín de baille asturianu pa calecer l’ambiente enantes de los conciertos.
La música en vivo entama a les 21h. La formación de música tradicional renovada Algaire va ser la encargada d’abrir un nueche a la que van siguir los ritmos contemporáneos de los sones del país, que los ponen Ferla Megía y Llevólu’l Sumiciu. D’esta manera electrónica, dembow, reggaeton y música de raigañu suenen nuna xornada que va zarrar DJ La Güeriata con un set nel que les propuestes más nueves de la música asturiana siéntense xunto a otros estilos internacionales y actuales.
Suscríbite a les nuestres novedaes
