Raï: La revuelta musical de la Kabilia

Dende hai bien d’años Arxelia vive nuna cásique permanente situación d’alarma producida pola violencia política y relixosa. Ún de los focos d’esta realidá tan tensa ye la zona de la Kabilia, asitiada nel oeste del estáu arxelín, y onde los motivos de la desestabilización social son bien distintos al restu del territoriu. Los sos habitantes son de cultura amazigh (más conocíos col términu bereber, pero qu’ellos mesmos refuguen por ser sinónimu de bárbaru); un pueblu que se resistió a la romanización y l’arabización del norte d’África. Trátase d’una entidá humana heteroxénea que, en bona parte, tien na llingua propia la base de la so identidá colectiva y que se caracteriza porque sobrevivió al traviés de la tradición oral. Amás de los naturales de la Kabilia, son amazighs tamién los nómades tuaregs, los habitantes del Atles, del Sous y el Rif marroquín, de la isla de Jerba (Túnez), de los oasis de Siwa (Exiptu) y delles tribus de Malí, Níxer, Mauritania, Chad y Burkina Faso. Tamién pertenecía a esti pueblu’l míticu cabezaleru rifeñu anticolonialista And el-Krim, o los almorávides y los almohades que na Edá Media s’espardieron pel este de la Península Ibérica, ensin escaecenos de que los antiguos guanches (pobladores orixinarios de les Isles Canaries) formaben parte d’esta cultura.

«Onde hai mayor conciencia ente’l pueblu amazigh de pertenecer a un colectivu humanu diferenciáu ye na Kabilia»

Pero onde hai mayor conciencia ente’l pueblu amazigh de pertenecer a un colectivu humanu diferenciáu ye na Kabilia. Ellí les asociaciones de defensa de la cultura y de la llingua tán afitaes dende cuantayá y cuenten coles sos propies organizaciones polítiques. La reivindicación identitaria, el refugue al menospreciu, la llucha contra l’abusu de poder de la xendarmería, xugaron un papel perimportante que dio como resultáu la situación actual nuna zona arguyosa de la so actuación na guerra de lliberación contra’l colonialismu francés. Pero ye sobre too la crisis económica y social lo qu’esplica’l rechazu del réxime por parte de la mocedá. Yá nos tiempos del partíu únicu del Frente de Lliberación Nacional la conocida como primavera bereber (1980) foi la primer señal de cuestionamientu d’aquel estatus políticu. Nella tuvo muncha relevancia l’actividá d’un cantante llamáu Ferhat Mehenni, que llevó públicamente les reivindicaciones d’enseñanza de la cultura amazigh, totalmente ignorada polos socesivos gobiernos, enfotaos nuna política d’arabización de la escuela. A principios del presente sieglu producióse una desobediencia cásique total al Estáu: impuestos ensin pagar, factures de gas y electricidá non regulaes, convocatories al serviciu militar ignoraes… pudiendo falar ensin reparu de la perda d’autoridá del gobiernu. Nos últimos años el poder central fixo delles concesiones: reconocencia del tamazight como llingua nacional, aprobación del estatutu particular y la promulgación de la xusta indemnización pa les víctimes de los disturbios. Too ello depués de más de sesenta muertos pola represión y de les multitudinaries manifestaciones de la mocedá, onde la cuestión identitaria y llingüística tuvo una importancia cimera. La población de la Kabilia, mui sensible a la reivindicación democrática y a la negación de la so cultura pol réxime, supo caltenese al marxe tanto del poder central como de los integristes, con una dinámica social y política autónoma.

«El raï yera la música de círculos pequeños que, magar la so marxinación o quiciabes por ello, evolucionó rápidamente»

En tou esti procesu tuvo una relevancia fundamental la música, verdaderu elementu de toma de conciencia poles xeneraciones más nueves, especialmente un estilu güei mui popular: el raï. Con esti términu (que podría traducise como ‘opinión’ o ‘conseyu’) desígnase a un soníu mestizu que foi surdiendo adulces a primeros del sieglu pasáu. Daquella la Kabilia vivía al ritmu del melhoun, una música inspirada nos grandes poetes del pasáu y del momentu, que podía sentise en toles ocasiones especiales (casorios, fiestes…). Los cheikhs, cantores y maestros consagraos, yeren los encargaos d’ello; pertenecer a esti estatus social taba acutao esclusivamente a una élite, pero a pesar d’estes restricciones sociales, dellos cantantes aficionaos deciden crear les sos propies composiciones: una mezcla de melhoun y de les sos improvisaciones. Estos nuevos creadores yeren principalmente pastores itinerantes o muyeres que, nes cases d’entretenimientu y distracción, baillaben y cantaben. Nos años venti, a los cafés, cabarés y burdeles de los barrios musulmanes y xudíos acudíen munchos europeos afincaos na zona. L’ambiente animábenlu les cheikhes, muyeres que cantaben les canciones de los cheikhs surdíos del pueblu. Nesos sitios tan poco prestixosos, el raï faise mestizu, amestando elementos musicales de los veceros que van a escuchalu. La ciudá portuaria d’Orán conviértese nel so principal centru de difusión. Esti estilu musical foi refugáu tanto poles autoridaes coloniales, como polos independentistes del FLN y polos gobiernos de l’Arxelia independiente, qu’optaron por apoyar como músiques nacionales a otres consideraes más nobles como l’andalusí. El raï yera la música de círculos pequeños que, magar la so marxinación o quiciabes por ello, evolucionó rápidamente a últimos de los años sesenta, cuando la so instrumentación tradicional cambió pa incorporar otra más moderna (saxos, baxos, guitarres, bateríes…).

Cheba Fadela blincó a les llistes d’éxitu europees
Cheb Hasni, asesináu en 1993 por fundamentalistes islámicos

Dos bonos exemplos p’adientrase nesta música pueden ser el raï más apegáu a los oríxenes de Cheikha Rimiti y el más averáu a les sonoridaes contemporánees de Cheb Khaled. La primera, llamada la madre del raï, morrió nel 2006 con 82 años. Yera natural d’Orán y escomenzó cantando de tabierna en tabierna con canciones onde criticaba los matrimonios arreglaos poles families; una muyer qu’actuaba en tugurios y burdeles, con temes nada condescendientes col réxime colonial, nun foi precisamente bien vista poles autoridaes, que la censuraron y persiguieron. Consideraba que’l raï modernu yera música americana, pero ello nun foi torga pa qu’en dellos de los sos discos llamara pa collaborar a Robert Fripp, Flea (baxista de Red Hot Chili Peppers) o East Bay Ray (de los Dead Kennedys).

«Cheikha Rimitti criticaba los matrimonios arreglaos poles families; yera una muyer qu’actuaba en tugurios y burdeles, con temes nada condescendientes col réxime colonial»

Cheb Khaled tien nomatu d’el rei del raï. Ye orixinariu tamién de la ciudá d’Orán y ye ún de los principales artífices de qu’esta música se conoza a nivel mundial. Les sos composiciones son una invitación a embarcase nun viaxe alredor del mundu, teniendo al raï como elementu central, pero fusionándolu col reggae, el funk, el flamencu, el calypso y hasta colos cantos d’Europa del Este. Sicasí, nún de los sos discos, Ya Rayi, quixo facer una especie de vuelta a los raigaños, onde nos afala a redescubrir tola maxa raï xenuina, tresportándonos directamente al típicu cabaré arxelín.

Cheikha Rimitti, madre del raï, foi una pionera nel so tiempu
Cheb Khaled ye’l que modernizó esti xéneru musical

El raï ye sinónimu de mestizaxe musical y de resistencia al pensamientu únicu, seya políticu o relixosu. Una música que ye la banda sonora de les reivindicaciones culturales y sociales de la Kabilia.

XUNE ELIPE. Artículu publicáu orixinalmente en Rockmería. Revisáu y ampliáu pa musicasturiana.com

Dexa un comentariu

X