L’alcuentru de música tradicional Crisol de Cuerda, celebráu n’Arlanzón (Burgos) ente’l 28 de xunetu y el 4 d’agostu, apostó na edición d’esti añu por un cartelu asturianu cola presencia de Silvia Quesada, Lisardo Prieto, Pepín de Muñalén, Alberto Ablanedo y Luis Nicolás ente’l profesoráu. Amosaron cantares, baille tradicional, melodíes instrumentales y recursos armónicos y d’acompañamientu al alumnáu del cursu dende la so perspectiva de la música asturiana.
Dempués de dellos años dedicando l’alcuentru a la tradición musical de Galicia, Euskadi, Cataluña, Bretaña, Irlanda o Suecia, la organización de Crisol de Cuerda decidió qu’Asturies protagonizara esta nueva edición. «Estos últimos años pudimos conocer la riqueza de la música asturiana al traviés d’Alberto Ablanedo, bouzukista de Felpeyu y persona mui querida en Crisol, y tamién por proyectos perinteresantes de divulgación de la música popular de vigulín que tán surdiendo n’Asturies, como les Xornaes del Vigulín de Piloña. Sentímonos mui inspiraos por ellos y pensamos que, agora sí, yera’l momentu de traer Asturies a Crisol de Cuerda», comenta Irene Portela, vigulinera y integrante de la organización de Crisol de Cuerda.
La presencia asturiana nel claustru sumóse a nomes como Alasdair Fraser -vigulín- y Natalie Haas -violonchelo-. La esperiencia d’esta edición, foi, según Portela «un aciertu redondu». Destaca, amás, lo interesante d’amestar al so repertoriu una cultura nueva que nun conocíen de primer mano y, per otru llau, «la calidá musical, pedagóxica y humana» del profesoráu d’Asturies. «Nun tenemos más que pallabres d’agradecimientu por tener compartío con nós un cachín de la so tradición y esperamos que les sos melodíes resuenen na memoria de los crisoleros y del pueblu d’Arlanzón durante munchos años», son los deseos del equipu de Crisol de Cuerda; un apueste pola música tradicional asturiana, que sigue espardiéndose per territorios estremaos.
Suscríbite a les nuestres novedaes
