«Revolucionémonos, porque la pandereta ye la ferramienta qu’empodera si tú quies qu’empodere»

Esti vienres 13 de mayu a les 19.30h, la Casa la Cultura de Grau acueye la charra Ente’l punk y les ruxideres. Muyer, contemporaneidá y música tradicional asturiana de Leticia Baselgas, cantante y panderetera venceyada dende mui moza a la música tradicional y anguaño metá del dúu post-folk L-R. Dende la so propia esperiencia y con una perspectiva crítica y feminista, Baselgas opina que «la tradición hai que comela, masticala, dixerila y llueu escupila como ún puea», y por eso da esta charra na qu’aplica la filosofía punk al ámbitu de la tradición.

«Soi dalguien que vive ente’l punk y les ruxideres. Que tien esa conciencia punk na forma d’entender y facer les coses y a la vez participa d’un mundu como’l de la tradición. Movese ente esos dos estayes foi lo que me fizo ser quien soi agora; crear el mio discursu, la mio narrativa y la forma d’entender la vida, calteniendo un equilibriu ente estes dos coses», desplica l’artista dexando claro que na charra nun va falar de «etnomusicoloxía nin cola perspectiva d’una esperta» y que lo que caracteriza a la ponencia va ser «una dinámica participativa, con una mirada heteroxénea na que tol mundu tien derechu a falar y a dar réplica». D’esta manera, la panderetera afonda nunes coses o otres dependiendo del interés que tenga la xente que participe nel alcuentru.

Con esta charra, Baselgas nagua por de deconstruir l’espectru simbólicu y social de la imaxen de “la panderetera”. «Falo de la memoria colectiva, de los procesos d’identidá… pa contestualizar cómo los discursos se crean por xente que tien la capacidá de ser oyida y eso acéptase pola relevancia personal d’esos personaxes y tendencies». Crítica col «encorsetamientu y la infantilización de la muyer y el rollu naíf que siempre se-y dio a determinaos asuntos dientro de la música asturiana», la panderetera retruca entendiendo que’l «poder de la subversión punk ye capaz a deconstruir los cambios d’actitú pa con esi discursu».

«¿Cómo s’enllaza el punk y la pandereta? Básicamente plantegando una filosofía punk aplicada a ello. Cambiémos el paradigma, revolucionémonos y la pandereta ye la ferramienta de poder que realmente empodera si tu quies qu’empodere», conclúi Leticia Baselgas sobre esta charra heterodoxa y heteroxénea na que convida a la xente a participar y reflexonar pa «deconstruir tolos clichés» qu’arrodien a la figura clásica de la panderetera y al ámbitu de la tradición.

Mercar discos de L-R