Rock Astur: historia d’una etiqueta
En 1979 na publicación Asturies Dixebrá del Conceyu Nacionalista Astur (CNA) apaeció per primer vez la etiqueta Rock Astur. Dixitalizamos esi artículu y facemos un repasu peles característiques de les etiquetes musicales y la evolución de la denominación rock astur a lo llargo los años.
Dende’l mesmu surdimientu de la pop music o música popular -nun confundir cola tradicional- nos primeros años del sieglu XX, escomenzaron tamién a distinguise estilos dientro d’ella que requeríen d’un nome pa identificalos. Nacieron asina los xéneros musicales como categoríes que valen pa ordenar les diferentes manifestaciones sonores acordies con unes característiques comunes. Categorizar la música ayuda a conceptualizala, distinguila y definila de manera más clara, tamién pa clasificala comercialmente. Col pasu del tiempu, los xéneros musicales más populares (pop, rock, jazz, folk…) foron diversificándose, faciendo necesario una mayor concreción na so axetivación, nacen asina les etiquetes coles qu’identificar les estremaes tendencies y soníos que se dan dientro d’ellos. Al mesmu tiempu, caúna d’estes etiquetes foron acoyendo les sos propies divisiones internes, hasta’l puntu de qu’anguaño existen cientos de manifestaciones musicales cola personalidá suficiente pa dar orixe a una categoría específica. Éstes comparten en mayor o menor midida unos criterios asemeyaos y/o una estética sonora. D’esti mou, nomes xenéricos como pop, rock, folk, hip hop o electrónica convirtiéronse en micro mundos sonoros nos que se dan infinidá d’etiquetes: rock sicodélicu, sinfónicu o progresivu, heavy metal, doom metal, acid-jazz, jungle-jazz, bebop, power pop, tecnopop, anti-folk, neofolk, folktrónica, ambient, techno-rumble, gangsta rap, chap hop, freestyle rap… por nomar namás unos pocos exemplos. Sicasí, dientro de les etiquetes musicales hailes tamién que faen referencia a un territoriu, país, zona o rexón xeográfica, ye’l casu del Afro-Beat, Latin Jazz, Britpop (Inglaterra), K-Pop (Corea), Euskal Rock (años 70) RRV o Rock Radikal Vascu (años 80), Brezhoneg Rock (Bretaña), Rock Bravú (Galicia)…
Anguaño, l’usu de les etiquetes pue contribuir al desarrollu d’una «nueva» música, afalando l’interés por ella ente l’audiencia y los medios de comunicación nos estadios iniciales d’esa tendencia. Delles d’estes etiquetes dan orixe a cultures que van más allá de lo puramente musical, xenerando identidaes coles qu’identificase y creando comunidaes que lleven venceyaes valores, comportamientos, vezos y hasta estilos de vida. Sicasí, ún de los inconvenientes n’atropar música al traviés d’etiquetes ta en que se trata d’un procesu suxetivu que depende del conocimientu personal y la manera de caún/a de sentir y escuchar la música. Los sos detractores argumenten que la categorización de la música en xéneros, estilos y/o etiquetes básase más en motivos comerciales y de mercáu qu’en criterios musicales.
«Dientro de les etiquetes musicales hailes que faen referencia a un territoriu, país, zona o rexón xeográfica y delles tamién dan orixe a cultures que van más allá de lo musical, xenerando identidaes»
En munches ocasiones los y les artistes refuguen asitiase dientro d’una etiqueta musical específica, alegando que trabayen a partir d’influyencies múltiples, que lo que faen ye inclasificable o que nun quieren que les sos composiciones queden asociaes a les idees y imaxinarios d’una etiqueta concreta. Per otru llau, tamién el públicu bien de veces amoria ante tanta terminoloxía y clasificación, coles sos époques referenciales, escenes, cultura y matices sonoros. El casu ye que, colos sos inconvenientes y beneficios, les etiquetes musicales desenvuelven una función importante como carta de presentación d’artistes concretos, ayudando a identificalos, visibilizando tamién escenes pequeñes o internacionalizando a un grupu de creadores sonoros d’una determinada zona xeográfica o país.
Nel sistema musical asturianu vien funcionando y espardiéndose dende hai años una d’eses etiquetes que s’usen pa clasificar y diferenciar un estilu sonoru particular, nesti casu con un nome xenéricu y otru xeográficu, falamos del conocíu como Rock Astur. Una denominación que surde a finales de los años 70 del sieglu XX pa referise, primero, al rock fechu n’Asturies de manera xenérica, pero que pasu ente pasu foi emplegándose p’agrupar a les bandes que se mandaben de la llingua asturiana pa facer les sos lletres; anguaño, afinando tovía más, suel utilizase esa etiqueta pa identificar a un estilu concretu: aquel que faen formaciones del país que canten n’asturianu, traten temes sociales o políticos nos sos testos, acueyen na so música influyencies diverses (rock, punk, folk, ska, reggae…) y cuenten ente la so instrumentación con elementos de la tradición llariega (gaita y/o acordión xeneralmente).
«La etiqueta Rock Astur surde a finales de los 70 y foi evolucionando hasta anguaño, que s’usa pa identificar a formaciones que canten n’asturianu, traten temes sociales, tienen influencies diverses y instrumentación con elementos de la tradición llariega»
Mui probablemente la primer vez que s’acuñó esi nome pa falar de la escena rockera asturiana foi nuna publicación llamada Asturies dixebrá, editada pola agrupación llocal uviedina de la organización política Conceyu Nacionalista Astur (CNA). Con un formatu a mediu camín ente la revista y el periódicu llegaron a sacase dellos númberos, con secciones dedicaes a temes históricos, llaborales, ecolóxicos, internacionales, llingüísticos, culturales, etc. Precisamente nel númberu cero, correspondiente al mes d’abril del añu 1979, na estaya ‘Cultural’ apaecía un artículu, ensin firma, tituláu «El rock astur faltu de gabita»; nél l’autor o autora quexábase de la falta d’atención que sufríen les bandes asturianes emerxentes naquel momentu (Asturcón, Crack, Liamba, Madson…), del centralismu musical existente nel Estáu español o de cómo los medios de comunicación marxinaben al rock fechu nel nuestru país. Namás cuatro años depués de la muerte del dictador Franco, nun momentu de replantegamientu global, nel que se cuestionaba y reflexionaba alredor de tolo qu’afectare a la sociedá, n’Asturies facíense consideraciones como esta: «Y la música, como fenómenu social que ye, nun pue escapase d’estes coordenaes que la tán emplegando como simple oxetu de satisfacción material dientro, amás, d’unos puntos de mira ideolóxico-políticos qu’esacrediten tou aquel tipu de música que tea dixebráu del ámbitu de los sos ideales políticos» (en referencia al establishment capitalista), acabando l’artículu cola frase «¡PUXA’L ROCK ASTUR!». Una vez creáu y asoleyáu’l términu, escomenzó a atribuyise yá cásique de manera esclusiva pa definir la música que taba desarrollando una de les bandes citaes naquel artículu, la xixonesa Asturcón (1978-1982), que col so amiestu de rock progresivu, folk y soníos asturianos -amás del emplegu de la llingua asturiana- foi una de les más llamatives y actives de la época. Los periodistes musicales y medios de comunicación espardieron esta etiqueta al falar del únicu discu que publicó Asturcón nel añu 1981; una denominación («Pioneros del Rock Astur») que diba constar na carátula de la reedición en Cd d’esti álbum nel 2004.
La denominación nun diba cayer nel olvidu y unos años depués, en 1987, una asociación cultural moza de Turón llamada La Forcá entamaba un conciertu embaxo esta etiqueta. L’eventu diba desenvolvese nel Salón de La Piscina del llugar y nél diben actuar dos bandes con conceptos musicales estremaos, pero col denominador común de la llingua asturiana: Dixebra y Güextia. Ún de los organizadores del conciertu, l’escritor turonés Xandru Fernández, diba convertise un tiempu depués nel autor de dalgunes de les lletres de los cantares más emblemáticos de Dixebra. Esta formación diba facer suya la etiqueta de Rock Astur y contribuyiría decisivamente al so afitamientu, popularización y divulgación, emplegándola en notes de prensa, merchandising, camisetes y cartelería. Bandes que diben surdir posteriormente -casu d’Avientu o Gomeru- tamién diben emplegala ensin nengún reparu. La etiqueta de Rock Astur principió a «socializase» cuando, por fin, xorrez una pequeña escena de bandes que se manden d’unos parámetros asemeyaos y pue falase d’un movimientu sonoru. Ello ye que la discográfica L’Aguañaz, sollerte a esti fenómenu, editaba nel 2003 un discu col titulu de Rock’n’llingua y el subtítulu de ‘Compilatoriu de Rock Astur’, nel qu’apaecen seis grupos d’esa escena, que da carta de naturaleza colectiva a la etiqueta.
Na actualidá falar de Rock Astur ye daqué avezao y a naide-y estraña’l so emplegu ente públicu y periodistes, una etiqueta surdida en plena Transición que foi matizándose hasta delimitar más afinadamente les propuestes musicales que podríen entrar dientro d’ella. Toa denominación unitaria que se quiera dar a una escena musical colectiva ye siempre reduccionista, porque caúna de les bandes que s’incluyan nella cuenten, de xuru, cola so propia personalidá y característiques. Sicasí, nun ambiente y situación como’l del rock cantáu n’asturianu, coles sos debilidaes y carencies, una denominación común pue ayudalu a visibilizalu y personalizalu nel maremágnum en que se convirtió’l fechu musical nel momentu presente.
Xune Elipe. Músicu y responsable de Discos L’Aguañaz / Goxe Producciones.
