Yo tenía diez años en 2006. Esi añu los Dropkick Murphys xiraben per Estaos Xuníos y Europa presentando The Warrior’s Code; los Flogging Molly asoleyaben un directu baxo’l títulu Whiskey on a Sunday y estiraben, entá, Within a Mile of Home, publicáu dos años enantes; y el 10.000 shots de The Real McKenzies consolidábase nos escenarios canadienses y europeos. Esi mesmu 2006, n’Asturies vio la lluz el discu que marcaría un enantes y un dempués na escena punk-folk del estáu español. Yera Semeya de la rabia y ellos yeren Skontra.
El grupu, qu’entamara en 2001 y qu’hasta entós namás publicara una maqueta homónima, irrumpía nel panorama musical asturianu entemeciendo influencies del punk británicu o del rock radical vascu cola sonoridá del raigañu. Una gaita plenamente integrada nes canciones, o dacuando una flauta qu’apaecía, marcaríen el camín de la banda, que si bien en dos canciones del discu (‘¡Llucha!‘ y ‘Asturies va bien‘) suxería una puerta abierta a los ritmos del ska, pronto la pesllaría pa siguir netamente’l senderu de lo que n’Irlanda o na diáspora irlandesa venía denominándose celtic punk.
Diez temes: seis n’asturianu y cuatro en castellán. Compromisu, rabia y rebeldía seríen los pilares qu’apuntalaría la banda asturiana. Na portada -diseñada por Delfo Valdés-, una neña col güeyu moráu desafía a la cámara: ella ye la semeya de la rabia. Énte la so mirada despierta una sociedá pa facer frente a la inxusticia; énte la so mirada bailla un gaiteru rudeboy; énte la so mirada una muyer presa sonríe porque, a pesar de too, ganó.
Per Tutu Estudios pasaron nes selmanes de grabación munches collaboraciones: dende los vientos de La Tarrancha a les voces de munchos amigos. Pero si hai daqué característico d’esa grabación que s’echaría en falta nos futuros directos ye la voz de Pitxe. Fundadora del grupu, cantante, xunto con Berto, y guitarrista, dexaría la banda poco dempués de terminar la grabación. Dalgunos de los grandes temes de Skontra, sintíos entá güei en cada conciertu (‘En tu honor‘ o ‘Son tus puños‘), namás se podríen volver a escuchar nel discu interpretaos per una de les voces femenines más representatives del punk asturianu de los dos mil.
Yo tenía diez años en 2006. Y entá nun lo sabía -cómo lo diba saber-, pero Skontra plantara una semiente dientro de min que yá solo había que regar. Un añu dempués de Semeya de la rabia nacieron en Galicia los Bastards on Parade. Dos años dempués de Semeya de la rabia nacieron en Madrid les Brutus’ Daughters -ellí taba Pitxe a les cuerdes-. Y, n’Asturies, diez años dempués de Semeya de la rabia, nació Ochobre. La banda de la que yo soi gaitera rudegirl préstame pensar que, en ciertu mou, ye fía de la mirada d’esa neña qu’un día desafió a la cámara y al mundu; heredera d’un discu que dialogó -y dialoga- col celtic punk internacional (Dropkick Murphys, Flogging Molly, The Real McKenzies, The Rumjacks…) ensin sacar nunca les manes de la tierra. De la nuestra tierra. Unes manes obreres, dignes, qu’icen a base d’acordes la bandera de la llibertá.
Cuando güei Ochobre y Skontra comparten escenariu, Berto, Gonza, Fredo, Carlinos, Fonci y Pastrana suelen convidame a tocar una canción cola gaita. La primer vez que subí a acompañalos con ‘En tu honor’, una mezcla d’emoción y respetu manifestóse nun temblor de piernes que me duró’l restu del conciertu. Nesos trés minutos, de repente, volví a 2006. Cuando yo tenía diez y años y entá nun sabía -cómo lo diba saber- que Skontra taba escribiendo parte de la historia musical d’Asturies y que yo, un día, munchos años dempués, durante trés minutos, sentiríame parte d’ella. Como una intrusa. Una intrusa inmensamente feliz.
Suscríbite a les nuestres novedaes
