Siero, Llanes y Avilés protagonicen l’axenda musical d’esti puente, con más de 15 actuaciones

Güei entama’l puente de Selmana Santa y aporta con más de 15 actuaciones de música y cultura n’asturianu. El Mercáu Polesu de Siero, el Llar Llanes Festival Folk y les Fiestes d’El Bollu d’Avilés axunten la mayor parte de los eventos, anque tamién va haber música’l país nes tabernes El Cuévano (La Pola) y Taberna Folk Las Ubiñas (Bárzana). Toles cites son con entrada llibre.

Esti miércoles 27, a les 21.30h, la Taberna El Cuévano de La Pola Siero -ún de los templos folkis d’Asturies- celebra’l so XIX Aniversariu cola actuación de la bandina tradicional del Eo-Navia Caldo y Os Rabizos. L’eventu sirve pa calentar lo qu’esta mesma villa va acoyer ente’l 28 y el 31 de marzu: El Mercáu Polesu de Güevos Pintos. Coincidiendo con esta fiesta, el Parque Alfonso X El Sabio va convertise nun espaciu de folcor, artesanía, música y teatru. Ente les actuaciones destaquen l’animación del mercáu con Ventolín y la Banda Gaites Xiranda (xueves 28 de 17h a 21h); los pases que la bandina popular Los Gascones van el vienres 29 y sábadu 30 pela tarde; y los conciertos de la bandina La Garrapiella (vienres 29 a les 20h), Alicia Villanueva y Carlos Velasco cola so asturianada (sábadu 30 a les 13h) y Pandereteros d’Anguaño (sábadu 30 a les 19.30h). Pa completar la programación va haber Cancios de Chigre a les 21h el vienres y el sábadu y el domingu a les 13h un Vermú en Danza.

Y del Centru al Oriente. En Llanes va celebrase’l vienres 29 y sábadu 30 la primer edición del Festival Folk Llar Llanes. El vienres la Escuela de Música Tradicional Llacín acueye -con toles entraes yá escosaes- los conciertos de les formaciones de folk de cámara Draque y Llau a les 18.30h; mientres que’l sábadu 30 la música en vivo trespórtase a Vibañu, llocalidá na que van tocar los grupos folk celta Llan de Cubel y Deira con entrada llibre. Xente veterano y nuevo de la música’l país axúntase nesta xornada entamada por Llar.

Fiestes d’El Bollu

Avilés ye’l tercer de los escenarios principales de l’axenda de conciertos d’esti puente. Coincidiendo coles fiestes d’El Bollu, na Plaza’l Parche van celebrase’l domingu 31 los conciertos del grupu post-folk L-R a les 19h y de la banda de rock rural Los Berrones a les 22h. Al día siguiente, festivu nesta ciudá, tamién toca la formación folk celta Guieldu nesi mesmu escenariu a les 19h.

Pa rematar completar l’axenda, el grupu punk-folk Ochobre toca na Cervecería La Traviesa de L’Infiestu’l sábadu 30 a les 20h, la Taberna Folk Las Ubiñas (en Bárzana, Quirós) celebra’l conciertu del grupu femenín de música tradicional Caparines el domingu 31 a les 12.30h y en Rozaes (Villaviciosa) toquen Pandereteros d’Anguaño‘l domingu a les 22h.. En Xixón, dientro de la XIV Primer Sidre L’Añu, que va durar del 28 al 31, la Banda Gaites El Gumial va facer dellos pases.

N’acabando’l puente entama un mes d’abril que vien cargáu d’eventos con presencia de la música’l país como la XLII Selmana del Folcor Astur en Siero (del 1 al 6), el Mercáu Tradicional La Flor de L.lena (6 y 7) el FICAL de Llangréu (del 12 al 14), Música en Rede (del 16 al 18) y la Folixa na Primavera de Mieres (19 y 20). Tola información ta na Axenda de musicasturiana.com

Dexa un comentariu

X