Doce formaciones asturianes van actuar nel Festival Interceltique de Lorient 2024

El Festival Interceltique Lorient ta acabante d’anunciar la programación pa la so 53 edición, que va tar dedicada a la mocedá de los países celtes. Nella destaca la participación d‘artistes, músicos y formaciones d’Asturies que van dende la cultura tradicional, hasta la electrónica, pasando pel folk celta: Banda de gaites La Laguna del Torollu & Banda Sinfónica del Ateneo Musical de Mieres, Baxel, Breizh Asturies Project, Calea, Deira, Eduardo Llosa, Escontra’l Raigañu, Iñaki Sánchez Santianes, L-R, La Banda Latira, Llevólu’l Sumiciu, Paula Vázquez, Rodrigo Cuevas y Silvia Quesada.

La representación asturiana va tener protagonismu en dellos formatos d’actuaciones y escenarios. D’esta manera, dientro de la programación de Musiques et Danses des Payses Celtes actúen Escontra’l Raigañu (llunes 12) y La Laguna del Torollu & Banda Sinfónica del Ateneo Musical de Mieres (sábadu 17), mentes que nel espectáculu Horizons Celtiques participen estes tres agrupaciones nos cuatro pases que va haber ente’l día 12 y 15. Per otru llau, Iñaki Santianes pon una masterclass de gaita’l sábadu 10 y Silvia Quesada canta y toca la pandereta dientro del espectáculu Celtic Odyseé #3 el miércoles 14.

Los escenarios Le Théâtre, Place des Pays Celtes, Le Palais, Le Kleub y Quai de la Bretagne van ser los otros nos que van sonar los artistes país. Les feches de conciertos son Rodrigo Cuevas el domingu 11 (Le Théâtre); Breizh Asturies Project el martes 13 (Place des Pays Celtes); Calea‘l miércoles 14 (Le Palais); La Banda Latira‘l miércoles 14 (Place des Pays Celtes); Deira‘l miércoles 14 (Place des Pays Celtes); L-R el xueves 15 (Le Kleub); Baxel el vienres 16 (Quai de la Bretagne) y sábadu 17 (Place des Pays Celtes); y Llevólu’l Sumiciu‘l vienres 16, sábadu 17 y domingu 18 (Le Kleub).

Mocedá celta

Nesta edición del eventu más prestixosu del mundu celta apuesten por intérpretes musicales más mozos y una de les iniciatives más novedoses ye la del Interceltic Music Camp. Nella’l festival va convidar a dieciséis xóvenes intérpretes d’ente 18 y 25 años a participar nuna residencia musical pa formar dos bandes capitaneaes polos músicos bretones Thomas Moisson y Youn Kamm. El percusionista Eduardo Llosa y la cantante y panderetera Paula Vega van ser la representación asturiana nestes orixinales propuestes musicales que van acturar tolos díes na Place des Pays Celtes y nes Terrasses du Festival.

En llinia cola mocedá celta a la que ta dedicada esta edición, el cartelu ilustra la imaxe de lo que la organización presenta como «un personaxe andróxinu, que bien podría ser galés, asturianu, bretón, escocés… tener 16 años, 20 años, 27 años… ¡Representa a tola mocedá celta! Nun encuadre baxu, allumáu, tresmite la renovación, el dinamismu, el poder de la cultura celta» .Yá tán a la venta les entraes pa esti festival que supón un escaparate inigualable p’Asturies al axuntar a más de 900.000 persones.

1 Comment

  • Peña Blanca
    28/03/2024

    Doce grupos pero con los mismos cincu o seis músicos en todos y que van todos los años. Una risión la imaxen que debemos tar dando.

Dexa un comentariu

X